ಕೌಟುಂಬಿಕ ಕಲಹ ಸೃಷ್ಟಿಸುತ್ತಿದೆ ಎಂವಿಡಿ ಚಲನ್ ಫೋಟೋ! - ಇ-ಚಲನ್ ಪೋರ್ಟಲ್‌ನಲ್ಲಿ ಮಹತ್ವದ ಬದಲಾವಣೆ

•   Thu, Sep 24 2026 04:27:04 PM



• ತಿರುವನಂತಪುರಂ, ಸೆ.24 (DaijiworldNews/TA): ರಸ್ತೆಗಳಲ್ಲಿ ಅಳವಡಿಸಿರುವ ಎಐ ಕ್ಯಾಮೆರಾಗಳ ಮೂಲಕ ಸಂಚಾರ ನಿಯಮ ಉಲ್ಲಂಘನೆ ಪತ್ತೆಹಚ್ಚಿ ದಂಡ ವಿಧಿಸುವ ಪ್ರಕ್ರಿಯೆಯಲ್ಲಿ ಮಹತ್ವದ ಬದಲಾವಣೆ ಮಾಡಲಾಗಿದೆ. ಇನ್ನು ಮುಂದೆ ಇ-ಚಲನ್‌ನಲ್ಲಿ ದಾಖಲಾಗಿರುವ ಉಲ್ಲಂಘನೆಯ ಚಿತ್ರಗಳನ್ನು ಯಾರೂ ಬೇಕಾದರೂ ವೀಕ್ಷಿಸಲು ಸಾಧ್ಯವಿಲ್ಲ. ವಾಹನ ಮಾಲೀಕರ ಅನುಮತಿಯೊಂದಿಗೆ ಮಾತ್ರ ಚಿತ್ರಗಳನ್ನು ಪರಿಶೀಲಿಸಲು ಸಾಧ್ಯವಾಗುವಂತೆ ಇ-ಚಲನ್ ಪೋರ್ಟಲ್ ಅನ್ನು ಪರಿಷ್ಕರಿಸಲಾಗಿದೆ.

  

  ಈ ಹಿಂದೆ ವಾಹನದ ನೋಂದಣಿ ಸಂಖ್ಯೆ ಗೊತ್ತಿದ್ದರೆ, ಆ ವಾಹನಕ್ಕೆ ಸಂಬಂಧಿಸಿದ ದಂಡದ ವಿವರಗಳನ್ನು ಪರಿಶೀಲಿಸುವುದರ ಜೊತೆಗೆ ಎಐ ಕ್ಯಾಮೆರಾದಲ್ಲಿ ದಾಖಲಾಗಿರುವ ಉಲ್ಲಂಘನೆಯ ಚಿತ್ರಗಳನ್ನೂ ವೀಕ್ಷಿಸಲು ಅಥವಾ ಡೌನ್‌ಲೋಡ್ ಮಾಡಲು ಅವಕಾಶವಿತ್ತು. ಆದರೆ ಈ ಸೌಲಭ್ಯವನ್ನು ಕೆಲವರು ದುರುಪಯೋಗಪಡಿಸಿಕೊಂಡಿರುವ ದೂರುಗಳು ಕೇಳಿಬಂದ ಹಿನ್ನೆಲೆಯಲ್ಲಿ ಹೊಸ ನಿರ್ಬಂಧ ಜಾರಿಗೆ ತರಲಾಗಿದೆ.

  ಎಐ ಕ್ಯಾಮೆರಾಗಳಲ್ಲಿ ದಾಖಲಾಗುವ ಚಿತ್ರಗಳು ಕೆಲವು ಸಂದರ್ಭಗಳಲ್ಲಿ ವಾಹನದಲ್ಲಿದ್ದ ವ್ಯಕ್ತಿಗಳನ್ನೂ ತೋರಿಸುತ್ತವೆ. ಇಂತಹ ಚಿತ್ರಗಳು ದಂಡದ ನೋಟಿಸ್‌ಗಳೊಂದಿಗೆ ಕುಟುಂಬಗಳಿಗೆ ತಲುಪಿದ ಬಳಿಕ ಕೌಟುಂಬಿಕ ಕಲಹಗಳಿಗೆ ಕಾರಣವಾಗಿರುವ ಘಟನೆಗಳು ವರದಿಯಾಗಿವೆ. ಇದಲ್ಲದೆ, ಮಹಿಳೆಯರ ಹೆಸರಿನಲ್ಲಿ ನೋಂದಣಿಯಾಗಿರುವ ವಾಹನಗಳ ದಂಡದ ವಿವರಗಳನ್ನು ಹುಡುಕಿ, ಅದರಲ್ಲಿರುವ ಚಿತ್ರಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿರುವ ಪ್ರಕರಣಗಳೂ ವರದಿಯಾಗಿವೆ. ಈ ಹಿನ್ನೆಲೆಯಲ್ಲಿ ಎಐ ಕ್ಯಾಮೆರಾಗಳ ಮೂಲಕ ಸಂಗ್ರಹವಾಗುವ ಚಿತ್ರಗಳ ಗೌಪ್ಯತೆಯನ್ನು ಕಾಪಾಡಲು ಹೊಸ ಕ್ರಮ ಕೈಗೊಳ್ಳಲಾಗಿದೆ.

  ಹೊಸ ವ್ಯವಸ್ಥೆಯಲ್ಲೂ ವಾಹನದ ಮೇಲೆ ವಿಧಿಸಲಾದ ದಂಡದ ಮಾಹಿತಿಯನ್ನು ಪರಿಶೀಲಿಸಲು ಅವಕಾಶವಿದೆ. ದಂಡ ವಿಧಿಸಿರುವ ಕುರಿತು ಮೊಬೈಲ್‌ಗೆ ಬರುವ SMSನಲ್ಲಿರುವ ಚಲನ್ ಸಂಖ್ಯೆಯನ್ನು ಬಳಸಿ ದಂಡದ ವಿವರಗಳನ್ನು ಪರಿಶೀಲಿಸಬಹುದು. ಆದರೆ ಉಲ್ಲಂಘನೆಯ ಚಿತ್ರಗಳನ್ನು ವೀಕ್ಷಿಸಲು ವಾಹನ ಮಾಲೀಕರ ಅನುಮತಿ ಅಗತ್ಯವಾಗಲಿದೆ. ಸಂಚಾರ ನಿಯಮ ಉಲ್ಲಂಘನೆ ನಿಜವಾಗಿಯೂ ನಡೆದಿದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಲು ಎಐ ಕ್ಯಾಮೆರಾದಲ್ಲಿ ದಾಖಲಾಗಿರುವ ಚಿತ್ರಗಳು ಮಹತ್ವದ್ದಾಗಿವೆ. ಹೀಗಾಗಿ ಅವುಗಳನ್ನು ಸಂಪೂರ್ಣವಾಗಿ ಸಾರ್ವಜನಿಕರಿಂದ ಮರೆಮಾಡುವ ಬದಲು, ಅಧಿಕೃತ ಪರಿಶೀಲನೆಗೆ ಅಗತ್ಯವಿರುವ ಸಂದರ್ಭದಲ್ಲಿ ಮಾತ್ರ ಲಭ್ಯವಾಗುವಂತೆ ವ್ಯವಸ್ಥೆ ಮಾಡಲಾಗಿದೆ.

  ವಾಹನ ಮಾಲೀಕರಿಗೆ ತಮ್ಮ ವಾಹನದ ಮೇಲೆ ವಿಧಿಸಿರುವ ದಂಡದ ಬಗ್ಗೆ ಆಕ್ಷೇಪಣೆ ಇದ್ದರೆ, ಸಂಬಂಧಪಟ್ಟ ಅಧಿಕೃತ ವೆಬ್‌ಸೈಟ್ ಮೂಲಕ ದೂರು ಅಥವಾ ಮೇಲ್ಮನವಿ ಸಲ್ಲಿಸಲು ಅವಕಾಶವಿದೆ. ಈ ಹಿಂದೆ ಕೂಡ AI ಕ್ಯಾಮೆರಾ ಮೂಲಕ ತಪ್ಪಾಗಿ ದಂಡ ವಿಧಿಸಲಾಗಿದೆ ಎಂದು ಭಾವಿಸುವ ವಾಹನ ಮಾಲೀಕರಿಗೆ ಮೇಲ್ಮನವಿ ಸಲ್ಲಿಸುವ ವ್ಯವಸ್ಥೆ ಇತ್ತು. AI ಕ್ಯಾಮೆರಾ ವ್ಯವಸ್ಥೆಯಡಿ ರಾಜ್ಯಾದ್ಯಂತ ನೂರಾರು ಕ್ಯಾಮೆರಾಗಳ ಮೂಲಕ ಸಂಚಾರ ಉಲ್ಲಂಘನೆಗಳನ್ನು ದಾಖಲಿಸಲಾಗುತ್ತಿದ್ದು, ಅವುಗಳ ದೃಶ್ಯಗಳ ಸಂಗ್ರಹ ಮತ್ತು ಬಳಕೆ ಕುರಿತಂತೆ ಗೌಪ್ಯತೆ ಹಾಗೂ ಆಡಳಿತಾತ್ಮಕ ಪ್ರಶ್ನೆಗಳು ಮುಂದುವರಿದಿವೆ.