ಕಾಂಡ್ಲಾದಲ್ಲಿ ಭಾರತದ ಮೊದಲ ಪೋರ್ಟ್ ಆಧಾರಿತ ಇ-ಮೆಥನಾಲ್ ಘಟಕಕ್ಕೆ ಶಂಕುಸ್ಥಾಪನೆ - ರೂ.2,300 ಕೋಟಿ ಹೂಡಿಕೆ

•   Sat, Sep 26 2026 07:34:19 PM



• ಗಾಂಧಿಧಾಮ, ಸೆ.26 (DaijiworldNews/TA): ಭಾರತದ ಮೊದಲ ಪೋರ್ಟ್ ಆಧಾರಿತ ಇ-ಮೆಥನಾಲ್ ಉತ್ಪಾದನಾ ಘಟಕಕ್ಕೆ ಗುಜರಾತ್‌ನ ಕಾಂಡ್ಲಾದಲ್ಲಿ ಶನಿವಾರ ಶಂಕುಸ್ಥಾಪನೆ ನೆರವೇರಿಸಲಾಯಿತು. ಗುಜರಾತ್ ಮುಖ್ಯಮಂತ್ರಿ ಭೂಪೇಂದ್ರ ಪಟೇಲ್, ಕೇಂದ್ರ ಬಂದರು, ಹಡಗು ಮತ್ತು ಜಲಮಾರ್ಗ ಸಚಿವ ಸರ್ಬಾನಂದ ಸೋನೋವಾಲ್ ಹಾಗೂ ಅಸ್ಸಾಂ ಮುಖ್ಯಮಂತ್ರಿ ಹಿಮಂತ ಬಿಸ್ವ ಶರ್ಮಾ ಅವರು ದೀನದಯಾಳ್ ಪೋರ್ಟ್ ಅಥಾರಿಟಿ ಆವರಣದಲ್ಲಿ ಯೋಜನೆಗೆ ಶಂಕುಸ್ಥಾಪನೆ ನೆರವೇರಿಸಿದರು.

  

  

  ಈ ಘಟಕದಲ್ಲಿ ದಿನಕ್ಕೆ 150 ಟನ್ ಇ-ಮೆಥನಾಲ್ ಉತ್ಪಾದಿಸುವ ಗುರಿ ಹೊಂದಲಾಗಿದೆ. ನವೀಕರಿಸಬಹುದಾದ ವಿದ್ಯುತ್, ನೀರು ಮತ್ತು ಜೈವಿಕ ಮೂಲದ CO₂ ಬಳಸಿ ಇ-ಮೆಥನಾಲ್ ಉತ್ಪಾದಿಸಲಾಗುತ್ತದೆ. ಹಡಗುಗಳಿಗೆ ಪರಿಸರ ಸ್ನೇಹಿ ಇಂಧನ ಒದಗಿಸುವುದು ಯೋಜನೆಯ ಪ್ರಮುಖ ಉದ್ದೇಶವಾಗಿದೆ. ಏಷ್ಯಾ–ಯುರೋಪ್ ಅಂತಾರಾಷ್ಟ್ರೀಯ ವ್ಯಾಪಾರ ಮಾರ್ಗದಲ್ಲಿ ಸಂಚರಿಸುವ ಹಡಗುಗಳಿಗೆ ಈ ಹಸಿರು ಇಂಧನವನ್ನು ಪೂರೈಸಲು ಉದ್ದೇಶಿಸಲಾಗಿದೆ. ಇದರಿಂದ ಜಾಗತಿಕ ಸಾಗರ ಸಾರಿಗೆ ಕ್ಷೇತ್ರಕ್ಕೆ ಹಸಿರು ಇಂಧನ ಪೂರೈಸುವ ರಾಷ್ಟ್ರವಾಗಿ ಭಾರತಕ್ಕೆ ಮತ್ತೊಂದು ಅವಕಾಶ ಸಿಗಲಿದೆ. ದೀನದಯಾಳ್ ಪೋರ್ಟ್ ಅಥಾರಿಟಿ ಮತ್ತು ಅಸ್ಸಾಂ ಪೆಟ್ರೋ-ಕೆಮಿಕಲ್ಸ್ ಲಿಮಿಟೆಡ್ ಜಂಟಿಯಾಗಿ ಈ ಯೋಜನೆಯನ್ನು ಕೈಗೆತ್ತಿಕೊಂಡಿವೆ. ಒಟ್ಟು ರೂ.2,300 ಕೋಟಿ ಹೂಡಿಕೆಯಲ್ಲಿ ಘಟಕವನ್ನು ಹಂತ ಹಂತವಾಗಿ ಅಭಿವೃದ್ಧಿಪಡಿಸಲಾಗುತ್ತದೆ.

  ಮೊದಲ ಹಂತದಲ್ಲಿ ದಿನಕ್ಕೆ 50 ಟನ್ ಉತ್ಪಾದನಾ ಸಾಮರ್ಥ್ಯವನ್ನು ರೂ. 1,200 ಕೋಟಿ ವೆಚ್ಚದಲ್ಲಿ ಸ್ಥಾಪಿಸುವ ಗುರಿ ಹೊಂದಲಾಗಿದ್ದು, 2027ರ ಜನವರಿಯಲ್ಲಿ ಪೂರ್ಣಗೊಳಿಸುವ ಉದ್ದೇಶವಿದೆ. ಎರಡನೇ ಹಂತದಲ್ಲಿ ಮತ್ತಷ್ಟು 100 ಟನ್ ಸಾಮರ್ಥ್ಯವನ್ನು ರೂ. 1,100 ಕೋಟಿ ವೆಚ್ಚದಲ್ಲಿ ಸೇರಿಸಲಾಗುತ್ತದೆ. ಈ ಹಂತವು 2027ರ ಮಾರ್ಚ್ ವೇಳೆಗೆ ಪೂರ್ಣಗೊಳ್ಳುವ ಗುರಿ ಹೊಂದಿದೆ. ಯೋಜನೆಯಲ್ಲಿ DPA ಮತ್ತು APCL ನಡುವಿನ ಬಂಡವಾಳ ಕೊಡುಗೆ ಅನುಪಾತವು 76:24 ಆಗಿದೆ. DPA ವತಿಯಿಂದ ರೂ.567.32 ಕೋಟಿ ಈಕ್ವಿಟಿ ಬಂಡವಾಳ, 75 ಎಕರೆ ಭೂಮಿ, ಉಪ್ಪುನೀರನ್ನು ಶುದ್ಧೀಕರಿಸಿದ ನೀರು ಹಾಗೂ ಹಸಿರು ಹೈಡ್ರೋಜನ್ ಸೇರಿದಂತೆ ನವೀಕರಿಸಬಹುದಾದ ಇಂಧನವನ್ನು ಒದಗಿಸಲಾಗುತ್ತದೆ.

  ಈ ಯೋಜನೆಯಿಂದ 3,500ಕ್ಕೂ ಹೆಚ್ಚು ನೇರ ಮತ್ತು ಪರೋಕ್ಷ ಉದ್ಯೋಗಗಳು ಸೃಷ್ಟಿಯಾಗುವ ನಿರೀಕ್ಷೆಯಿದೆ. ಕಾಂಡ್ಲಾ ಸುತ್ತಮುತ್ತ ಹಸಿರು ಇಂಧನ ಉತ್ಪಾದನೆ, ಸಾಗಣೆ, ಸಂಗ್ರಹಣೆ ಹಾಗೂ ಪೂರೈಕೆ ಸೇರಿದಂತೆ ಸಂಪೂರ್ಣ ಹಸಿರು ಇಂಧನ ಮೌಲ್ಯ ಸರಪಳಿಗೆ ಉತ್ತೇಜನ ಸಿಗಲಿದೆ. ಯೋಜನೆಯಡಿ ಉತ್ಪಾದನೆಯಾಗುವ ಹಸಿರು ಮೆಥನಾಲ್ ಪ್ರತಿ ಟನ್‌ಗೆ ಸುಮಾರು 750 ಅಮೆರಿಕನ್ ಡಾಲರ್ ವೆಚ್ಚವಾಗಲಿದೆ ಎಂದು ತಿಳಿಸಲಾಗಿದೆ. ಜಾಗತಿಕ ಮಟ್ಟದಲ್ಲಿ ಇದೇ ಉತ್ಪಾದನೆಯ ವೆಚ್ಚ ಸುಮಾರು 1,300 ಡಾಲರ್‌ಗಳಷ್ಟಿದೆ ಎಂದು ಯೋಜನೆಯ ವಿವರಗಳಲ್ಲಿ ಉಲ್ಲೇಖಿಸಲಾಗಿದೆ.

  ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ 2070ರ ವೇಳೆಗೆ ನೆಟ್ ಜೀರೋ ಹೊರಸೂಸುವಿಕೆ ಗುರಿಗೆ ಈ ಯೋಜನೆ ಸಹಕಾರಿಯಾಗಲಿದೆ ಎಂದು ಕೇಂದ್ರ ಸರ್ಕಾರ ತಿಳಿಸಿದೆ. ಜೊತೆಗೆ ‘ಆತ್ಮನಿರ್ಭರ ಭಾರತ’, ‘ಮೇಕ್ ಇನ್ ಇಂಡಿಯಾ’ ಮತ್ತು ‘ಮೇಕ್ ಫಾರ್ ದಿ ವರ್ಲ್ಡ್’ ಉದ್ದೇಶಗಳಿಗೂ ಯೋಜನೆ ನೆರವಾಗಲಿದೆ ಎಂದು ಹೇಳಲಾಗಿದೆ.

  ಈ ಸಂದರ್ಭದಲ್ಲಿ ಮಾತನಾಡಿದ ಗುಜರಾತ್ ಮುಖ್ಯಮಂತ್ರಿ ಭೂಪೇಂದ್ರ ಪಟೇಲ್, ಗುಜರಾತ್ ಭಾರತದ ಜಗತ್ತಿನತ್ತದ ಹೆಬ್ಬಾಗಿಲಾಗಿದ್ದು, ಇದೀಗ ಹಸಿರು ಇಂಧನದ ಜಾಗತಿಕ ಕೇಂದ್ರವಾಗುವತ್ತ ಸಾಗುತ್ತಿದೆ ಎಂದು ಹೇಳಿದರು. ಕೇಂದ್ರ ಸಚಿವ ಸರ್ಬಾನಂದ ಸೋನೋವಾಲ್, ಭಾರತ ಜಾಗತಿಕ ಸಾಗರ ಶಕ್ತಿಯಾಗಿ ಮುನ್ನಡೆಯುತ್ತಿದ್ದು, ಮುಂದಿನ ದಿನಗಳಲ್ಲಿ ವಿಶ್ವದ ಹಡಗುಗಳಿಗೆ ಹಸಿರು ಇಂಧನ ಪೂರೈಸುವ ಸಾಮರ್ಥ್ಯವನ್ನು ಹೊಂದಲಿದೆ ಎಂದು ಹೇಳಿದರು. ಅಸ್ಸಾಂ ಮುಖ್ಯಮಂತ್ರಿ ಹಿಮಂತ ಬಿಸ್ವ ಶರ್ಮಾ, ಅಸ್ಸಾಂ ಈ ಹಿಂದೆ ತೈಲ ಮತ್ತು ಚಹಾ ಮೂಲಕ ಭಾರತದ ಅಭಿವೃದ್ಧಿಗೆ ಕೊಡುಗೆ ನೀಡಿದ್ದು, ಇದೀಗ ಹಸಿರು ಇಂಧನದ ಮೂಲಕ ಜಗತ್ತಿಗೆ ಕೊಡುಗೆ ನೀಡುವತ್ತ ಸಾಗುತ್ತಿದೆ ಎಂದು ಹೇಳಿದರು.

  ಕಾರ್ಯಕ್ರಮದಲ್ಲಿ ಕಚ್ ಲೋಕಸಭಾ ಸದಸ್ಯ ವಿನೋದ್ ಚಾವ್ಡಾ, ಗಾಂಧಿಧಾಮ ಶಾಸಕ ಮಾಲ್ತಿಬೆನ್ ಕಿಶೋರ್ ಮಹೇಶ್ವರಿ, ಅಸ್ಸಾಂ ಸರ್ಕಾರದ ರಾಜಕೀಯ ಕಾರ್ಯದರ್ಶಿ ತರಂಗ ಗೊಗೊಯಿ, ಅಸ್ಸಾಂ ಪೆಟ್ರೋ-ಕೆಮಿಕಲ್ಸ್ ಅಧ್ಯಕ್ಷ ಬಿಕುಲ್ ದೇಕಾ, ಉಪಾಧ್ಯಕ್ಷ ಹೇಮಂತ ಗೊಗೊಯಿ ಹಾಗೂ ದೀನದಯಾಳ್ ಪೋರ್ಟ್ ಅಥಾರಿಟಿ ಅಧ್ಯಕ್ಷ ಸುಶೀಲ್ ಕುಮಾರ್ ಸಿಂಗ್ ಸೇರಿದಂತೆ ಹಲವು ಗಣ್ಯರು ಉಪಸ್ಥಿತರಿದ್ದರು.