ಐಎಎಸ್‌ ಅವಧಿಜಾ ಗುಪ್ತಾ ಯಶಸ್ಸಿನ ಕಥನ

•   Sun, Sep 27 2026 07:50:35 AM



• ಮುಂಬೈ, ಸೆ.27 (DaijiworldNews/TA): ಯಶಸ್ಸು ಸಾಧಿಸಲು ನಿರಂತರ ಪರಿಶ್ರಮ ಹಾಗೂ ಸೋಲಿನ ನಡುವೆಯೂ ಗುರಿಯತ್ತ ಸಾಗುವ ಛಲ ಎಷ್ಟು ಮುಖ್ಯ ಎಂಬುದಕ್ಕೆ ಮಹಾರಾಷ್ಟ್ರದ ಅವಧಿಜಾ ಗುಪ್ತಾ ಅವರ ಯುಪಿಎಸ್‌ಸಿ ಪಯಣ ಉತ್ತಮ ಉದಾಹರಣೆಯಾಗಿದೆ.

  

  ಹಲವು ಬಾರಿ ವಿಫಲವಾದರೂ ಆತ್ಮವಿಶ್ವಾಸ ಕಳೆದುಕೊಳ್ಳದೆ ಪ್ರಯತ್ನ ಮುಂದುವರಿಸಿದ ಅವರು, ಯುಪಿಎಸ್‌ಸಿ ನಾಗರಿಕ ಸೇವೆಗಳ ಪರೀಕ್ಷೆ 2024ರಲ್ಲಿ ಅಖಿಲ ಭಾರತ 43ನೇ ರ‍್ಯಾಂಕ್ (AIR 43) ಗಳಿಸಿದ್ದಾರೆ. ಅವಧಿಜಾ ಅವರ ಯುಪಿಎಸ್‌ಸಿ ಪಯಣ ಸುಮಾರು ಐದು ವರ್ಷಗಳ ಕಾಲ ಸವಾಲುಗಳಿಂದ ಕೂಡಿತ್ತು. ಮೂಲತಃ ಮಹಾರಾಷ್ಟ್ರದವರಾದ ಅವರು, ತಂದೆಯ ವರ್ಗಾವಣೆ ಉದ್ಯೋಗದ ಕಾರಣ ದೇಶದ ವಿವಿಧ ಭಾಗಗಳಲ್ಲಿ ಶಿಕ್ಷಣ ಪಡೆದರು. ರಾಜಸ್ಥಾನದಲ್ಲಿ 10ನೇ ತರಗತಿ ಹಾಗೂ ಕೋಲ್ಕತ್ತಾದಲ್ಲಿ 12ನೇ ತರಗತಿ ಶಿಕ್ಷಣ ಪೂರ್ಣಗೊಳಿಸಿದರು.

  2020ರಲ್ಲಿ ಪದವಿ ಪೂರ್ಣಗೊಳಿಸಿದ ಬಳಿಕ ನಾಗರಿಕ ಸೇವಾ ಪರೀಕ್ಷೆಯೇ ತಮ್ಮ ಗುರಿ ಎಂದು ಅವಧಿಜಾ ನಿರ್ಧರಿಸಿದರು. ಬಳಿಕ ಯುಪಿಎಸ್‌ಸಿ ಪರೀಕ್ಷೆಗೆ ಸಿದ್ಧತೆ ಆರಂಭಿಸಿದರು. ಆದರೆ ಮೊದಲ ಎರಡು ಪ್ರಯತ್ನಗಳಲ್ಲಿ ಅವರಿಗೆ ಪ್ರಾಥಮಿಕ ಪರೀಕ್ಷೆಯ ಹಂತವನ್ನೇ ದಾಟಲು ಸಾಧ್ಯವಾಗಲಿಲ್ಲ. 2023ರಲ್ಲಿ ಮೂರನೇ ಬಾರಿಗೆ ಪರೀಕ್ಷೆ ಎದುರಿಸಿದರೂ ನಿರೀಕ್ಷಿತ ಯಶಸ್ಸು ಸಿಗಲಿಲ್ಲ. ಪದೇ ಪದೇ ಎದುರಾದ ವೈಫಲ್ಯಗಳು ಆತ್ಮವಿಶ್ವಾಸ ಕುಗ್ಗಿಸುವ ಸಾಧ್ಯತೆಯಿದ್ದರೂ ಅವಧಿಜಾ ಅವರು ತಮ್ಮ ಗುರಿಯನ್ನು ಕೈಬಿಡಲಿಲ್ಲ. ನಾಲ್ಕು ವರ್ಷಗಳ ಅನುಭವವೇ ಬದಲಾವಣೆಗೆ ಕಾರಣ ನಿರಂತರ ಪ್ರಯತ್ನದಿಂದ ಪರೀಕ್ಷೆಯ ಸ್ವರೂಪ, ತಮ್ಮಲ್ಲಿರುವ ಕೊರತೆಗಳು ಹಾಗೂ ತಯಾರಿಯಲ್ಲಿ ಮಾಡಬೇಕಾದ ಬದಲಾವಣೆಗಳ ಬಗ್ಗೆ ಅವಧಿಜಾ ಅವರಿಗೆ ಸ್ಪಷ್ಟತೆ ದೊರೆಯಿತು.

  ಹಿಂದಿನ ಪ್ರಯತ್ನಗಳಿಂದ ಪಡೆದ ಅನುಭವವನ್ನು ಆಧರಿಸಿ ಮತ್ತಷ್ಟು ಸಮರ್ಪಕವಾಗಿ ತಯಾರಿ ನಡೆಸಿದರು. ಈ ಬಾರಿ ಆತುರ ಅಥವಾ ಭಯಕ್ಕಿಂತಲೂ ಯಶಸ್ಸು ಸಾಧಿಸಲೇಬೇಕು ಎಂಬ ದೃಢ ಸಂಕಲ್ಪ ಅವರಲ್ಲಿತ್ತು. ಅಂತಿಮವಾಗಿ 2024ರ ಯುಪಿಎಸ್‌ಸಿ ನಾಗರಿಕ ಸೇವೆಗಳ ಪರೀಕ್ಷೆಯ ಫಲಿತಾಂಶ ಹೊರಬಂದಾಗ ಅವಧಿಜಾ ಅವರು ಅಖಿಲ ಭಾರತ 43ನೇ ರ‍್ಯಾಂಕ್ ಪಡೆದು ಗಮನ ಸೆಳೆದರು. ಅವಧಿಜಾ ಗುಪ್ತಾ ಅವರ ಪಯಣವು ಒಂದೆರಡು ವೈಫಲ್ಯಗಳಿಂದ ಯಶಸ್ಸು ನಿರ್ಧಾರವಾಗುವುದಿಲ್ಲ ಎಂಬುದನ್ನು ತೋರಿಸುತ್ತದೆ. ಗುರಿಯತ್ತ ನಿರಂತರವಾಗಿ ಪ್ರಯತ್ನಿಸುತ್ತಾ, ಹಿಂದಿನ ತಪ್ಪುಗಳಿಂದ ಕಲಿತು ಮುನ್ನಡೆಯುವುದೇ ಯಶಸ್ಸಿನ ದಾರಿ ಎಂಬ ಸಂದೇಶವನ್ನು ಅವರ ಸಾಧನೆ ನೀಡುತ್ತದೆ.