ವಿಮಾನ ಇಂಧನ ಬೆಲೆ ಏರಿಕೆ - ವಿಮಾನಯಾನ ಸಂಸ್ಥೆಗಳಿಗೆ ಹೆಚ್ಚಿದ ವೆಚ್ಚದ ಹೊರೆ

•   Thu, Oct 01 2026 10:51:21 AM



• ನವದೆಹಲಿ, ಅ.01 (DaijiworldNews/TA): ದೇಶೀಯ ವಿಮಾನಯಾನ ಸಂಸ್ಥೆಗಳಿಗೆ ಅಕ್ಟೋಬರ್ ಆರಂಭದಲ್ಲೇ ಇಂಧನ ಬೆಲೆ ಏರಿಕೆಯ ಹೊರೆ ಎದುರಾಗಿದೆ. ವಿಮಾನ ಟರ್ಬೈನ್ ಇಂಧನ ದರ ಲೀಟರ್‌ಗೆ ಸುಮಾರು ರೂ.16ರಷ್ಟು ಹೆಚ್ಚಳವಾಗಿ ರೂ.121ರಿಂದ ರೂ.137ಕ್ಕೆ ಏರಿಕೆಯಾಗಿದೆ. ಸೆಪ್ಟೆಂಬರ್‌ನಲ್ಲೂ ಎಟಿಎಫ್ ದರ ರೂ. 6.28ರಷ್ಟು ಹೆಚ್ಚಳವಾಗಿತ್ತು.

  

  ವಿಮಾನಯಾನ ಸಂಸ್ಥೆಗಳ ಒಟ್ಟು ಕಾರ್ಯಾಚರಣಾ ವೆಚ್ಚದಲ್ಲಿ ಇಂಧನದ ಪಾಲು ಸುಮಾರು 35-40 ಪ್ರತಿಶತದವರೆಗೆ ಇರಬಹುದಾದ ಕಾರಣ, ನಿರಂತರ ಎಟಿಎಫ್ ಬೆಲೆ ಏರಿಕೆಯು ಸಂಸ್ಥೆಗಳ ವೆಚ್ಚದ ಮೇಲೆ ಒತ್ತಡ ಹೆಚ್ಚಿಸುವ ಸಾಧ್ಯತೆಯಿದೆ. ಎಟಿಎಫ್ ಬೆಲೆ ಏರಿಕೆಯಿಂದ ವಿಮಾನಯಾನ ಸಂಸ್ಥೆಗಳ ಕಾರ್ಯಾಚರಣಾ ವೆಚ್ಚ ಹೆಚ್ಚಾಗುವ ಸಾಧ್ಯತೆಯಿದ್ದರೂ, ತಕ್ಷಣವೇ ವಿಮಾನ ಟಿಕೆಟ್ ದರ ಏರಿಕೆಯಾಗಲಿದೆ ಎಂದು ಹೇಳಲು ಸಾಧ್ಯವಿಲ್ಲ. ಪ್ರಯಾಣಿಕರ ಬೇಡಿಕೆ, ಸೀಟ್ ಲಭ್ಯತೆ, ಮಾರ್ಗ, ಸ್ಪರ್ಧೆ ಹಾಗೂ ವಿಮಾನಯಾನ ಸಂಸ್ಥೆಗಳ ದರ ನೀತಿ ಸೇರಿದಂತೆ ಹಲವು ಅಂಶಗಳು ಟಿಕೆಟ್ ದರವನ್ನು ನಿರ್ಧರಿಸುತ್ತವೆ.

  ವಿಮಾನ ಇಂಧನದ ಜೊತೆಗೆ 19 ಕೆಜಿ ವಾಣಿಜ್ಯ LPG ಸಿಲಿಂಡರ್ ಬೆಲೆಯೂ ರೂ. 62.50ರಷ್ಟು ಹೆಚ್ಚಾಗಿದೆ. ದೆಹಲಿಯಲ್ಲಿ ಹೊಸ ದರ ರೂ.2,810 ಆಗಿದ್ದು, ಮುಂಬೈನಲ್ಲಿ ರೂ.2,764, ಚೆನ್ನೈನಲ್ಲಿ ರೂ.2,983 ಹಾಗೂ ಪಾಟ್ನಾದಲ್ಲಿ ರೂ.3,100.50ಕ್ಕೆ ತಲುಪಿದೆ. ಈ ಬೆಲೆ ಏರಿಕೆಯ ನೇರ ಪರಿಣಾಮ ಹೋಟೆಲ್‌, ರೆಸ್ಟೋರೆಂಟ್‌ ಸೇರಿದಂತೆ ವಾಣಿಜ್ಯ ಬಳಕೆದಾರರ ಮೇಲೆ ಬೀಳುವ ಸಾಧ್ಯತೆಯಿದೆ.

  ಸದ್ಯಕ್ಕೆ ಗೃಹಬಳಕೆದಾರರಿಗೆ ಯಾವುದೇ ಬೆಲೆ ಏರಿಕೆ ಇಲ್ಲ. 14.2 ಕೆಜಿ ಗೃಹಬಳಕೆಯ LPG ಸಿಲಿಂಡರ್ ದರದಲ್ಲಿ ಯಾವುದೇ ಬದಲಾವಣೆ ಮಾಡಲಾಗಿಲ್ಲ. ದೆಹಲಿಯಲ್ಲಿ ಇದರ ಬೆಲೆ ರೂ. 942ರಲ್ಲೇ ಮುಂದುವರಿದಿದೆ. ಪೆಟ್ರೋಲ್ ಮತ್ತು ಡೀಸೆಲ್ ದರಗಳಲ್ಲೂ ಈ ಪರಿಷ್ಕರಣೆಯಲ್ಲಿ ಬದಲಾವಣೆ ಮಾಡಲಾಗಿಲ್ಲ. ATF ಮತ್ತು LPG ದರಗಳ ಮಾಸಿಕ ಪರಿಷ್ಕರಣೆಯಲ್ಲಿ ಅಂತರರಾಷ್ಟ್ರೀಯ ಬೆಂಚ್‌ಮಾರ್ಕ್ ಬೆಲೆಗಳು ಹಾಗೂ ರೂಪಾಯಿ-ಡಾಲರ್ ವಿನಿಮಯ ದರ ಪ್ರಮುಖ ಪಾತ್ರ ವಹಿಸುತ್ತವೆ. ರಾಜ್ಯ ತೆರಿಗೆಗಳ ಕಾರಣ ವಿವಿಧ ನಗರಗಳಲ್ಲಿ ಅಂತಿಮ ಬೆಲೆಗಳಲ್ಲಿ ವ್ಯತ್ಯಾಸ ಕಂಡುಬರುತ್ತದೆ.

  ಇದೇ ವೇಳೆ, ಅಕ್ಟೋಬರ್ 1ರಿಂದ ಸಬ್ಸಿಡಿ ದರದಲ್ಲಿ ಗೃಹ LPG ರಿಫಿಲ್ ಪಡೆಯಲು ಬಯಸುವ ಗ್ರಾಹಕರಿಗೆ ಬಯೋಮೆಟ್ರಿಕ್ ಆಧಾರ್ ದೃಢೀಕರಣ ಕಡ್ಡಾಯವಾಗಿದೆ ಎಂದು ಕೇಂದ್ರ ಪೆಟ್ರೋಲಿಯಂ ಸಚಿವಾಲಯ ತಿಳಿಸಿದೆ. ಸೆಪ್ಟೆಂಬರ್ 19ರ ವೇಳೆಗೆ 27.43 ಕೋಟಿ, ಅಂದರೆ ಶೇ.89.9 ಸಕ್ರಿಯ ಗೃಹ LPG ಗ್ರಾಹಕರು ದೃಢೀಕರಣ ಪೂರ್ಣಗೊಳಿಸಿದ್ದರು.