ನಿವೃತ್ತಿಗೂ ಮುನ್ನ ತೇಜಸ್‌ನಲ್ಲಿ ಕೊನೇಯ ಹಾರಾಟ - ಐಎಎಫ್ ಮುಖ್ಯಸ್ಥ ಎಪಿ ಸಿಂಗ್‌ಗೆ ಭಾವುಕ ಕ್ಷಣ!

•   Tue, Oct 13 2026 01:32:14 PM



• ನವದೆಹಲಿ, ಅ.13 (DaijiworldNews/TA): ಭಾರತೀಯ ವಾಯುಪಡೆಯ ಮುಖ್ಯಸ್ಥ ಏರ್ ಚೀಫ್ ಮಾರ್ಷಲ್ ಎಪಿ ಸಿಂಗ್ ಅವರು ನಿವೃತ್ತಿಗೂ ಮುನ್ನ ಸ್ವದೇಶಿ ಯುದ್ಧ ವಿಮಾನ ತೇಜಸ್‌ನಲ್ಲಿ ತಮ್ಮ ಕೊನೇಯ ಯುದ್ಧ ವಿಮಾನ ಹಾರಾಟ ನಡೆಸಿದ್ದಾರೆ. ಅಕ್ಟೋಬರ್ 31ರಂದು ಸೇವೆಯಿಂದ ನಿವೃತ್ತರಾಗಲಿರುವ ಅವರು, ಜೋಧ್‌ಪುರ ವಾಯುನೆಲೆಯಲ್ಲಿ ನಡೆದ ‘ತರಂಗ್ ಶಕ್ತಿ-2026’ ಬಹುರಾಷ್ಟ್ರೀಯ ವಾಯು ಸಮರಾಭ್ಯಾಸದ ಸಂದರ್ಭದಲ್ಲಿ ಈ ಹಾರಾಟ ನಡೆಸಿದ್ದಾರೆ ಎಂದು ಭಾರತೀಯ ವಾಯುಪಡೆ ತಿಳಿಸಿದೆ.

  

  ಯುದ್ಧ ಪೈಲಟ್ ಆಗಿ ದಶಕಗಳ ಕಾಲ ಸೇವೆ ಸಲ್ಲಿಸಿರುವ ಎಪಿ ಸಿಂಗ್ ಅವರ ಈ ಹಾರಾಟವು, ಮುಂಚೂಣಿಯಲ್ಲಿ ನಿಂತು ಮುನ್ನಡೆಸುವ ನಾಯಕತ್ವದ ಮನೋಭಾವವನ್ನು ಪ್ರತಿಬಿಂಬಿಸುತ್ತದೆ ಎಂದು ವಾಯುಪಡೆ ತನ್ನ ಅಧಿಕೃತ ಎಕ್ಸ್ ಖಾತೆಯಲ್ಲಿ ಹಂಚಿಕೊಂಡಿದೆ. ಈ ಸಂದರ್ಭದಲ್ಲಿ ಅವರು ತೇಜಸ್ ಯುದ್ಧ ವಿಮಾನದಲ್ಲಿ ಹಾರಾಟ ನಡೆಸುತ್ತಿರುವ ವಿಡಿಯೊ ಹಾಗೂ ವಿದೇಶಿ ವಿಮಾನಗಳು ಮತ್ತು ಸೂರ್ಯಕಿರಣ್ ಏರೋಬ್ಯಾಟಿಕ್ ತಂಡದೊಂದಿಗೆ ನಡೆಸಿದ ಹಾರಾಟದ ಚಿತ್ರಗಳನ್ನೂ ಪ್ರಕಟಿಸಲಾಗಿದೆ.

  ಎಪಿ ಸಿಂಗ್ ಅವರ ಕೊನೆಯ ಯುದ್ಧ ವಿಮಾನ ಹಾರಾಟವನ್ನು ವಿಶೇಷ ಕ್ಷಣವೆಂದು ಬಣ್ಣಿಸಿರುವ ಭಾರತೀಯ ವಾಯುಪಡೆ, ಅವರ ವೃತ್ತಿಜೀವನದ ಉತ್ಸಾಹ ಮತ್ತು ದೇಶಸೇವೆಯ ಬದ್ಧತೆಯನ್ನು ಸ್ಮರಿಸಿದೆ. ‘ಜೀವಮಾನವಿಡೀ ಹಾರಾಟದ ಮೇಲಿನ ಉತ್ಸಾಹ, ರಾಷ್ಟ್ರದ ಸೇವೆಯ ಮೇಲಿನ ಅಚಲ ಬದ್ಧತೆ. ಸ್ವದೇಶಿ ತೇಜಸ್‌ನ ನಿಯಂತ್ರಣದಲ್ಲಿ ವಾಯುಪಡೆಯ ಮುಖ್ಯಸ್ಥರು ತಮ್ಮ ಕೊನೆಯ ಯುದ್ಧ ವಿಮಾನ ಹಾರಾಟಕ್ಕಾಗಿ ಆಕಾಶಕ್ಕೆ ಹಾರಿದ್ದಾರೆ’ ಎಂಬರ್ಥದ ಸಂದೇಶವನ್ನು ವಾಯುಪಡೆ ಹಂಚಿಕೊಂಡಿದೆ.

  ‘ಒಂದು ಅಧ್ಯಾಯ ಮುಕ್ತಾಯಗೊಳ್ಳುತ್ತಿದ್ದರೂ ಉತ್ಸಾಹ ಕಡಿಮೆಯಾಗುವುದಿಲ್ಲ. ಹಾರಾಟದ ಅಧ್ಯಾಯ ಕೊನೆಗೊಳ್ಳಬಹುದು, ಆದರೆ ರಾಷ್ಟ್ರದ ಸೇವೆಯ ಧ್ಯೇಯ ಮುಂದುವರಿಯುತ್ತದೆ. ಒಮ್ಮೆ ಯುದ್ಧ ಪೈಲಟ್, ಎಂದೆಂದಿಗೂ ಯುದ್ಧ ಪೈಲಟ್’ ಎಂದು ವಾಯುಪಡೆ ಭಾವುಕವಾಗಿ ಬರೆದುಕೊಂಡಿದೆ. ಜೋಧ್‌ಪುರ ವಾಯುನೆಲೆಯಲ್ಲಿ ನಡೆಯುತ್ತಿರುವ ‘ತರಂಗ್ ಶಕ್ತಿ’ಯ ಎರಡನೇ ಆವೃತ್ತಿಯಲ್ಲಿ ಅಮೆರಿಕ, ಫ್ರಾನ್ಸ್, ಜರ್ಮನಿ, ಆಸ್ಟ್ರೇಲಿಯಾ, ಬಾಂಗ್ಲಾದೇಶ, ಶ್ರೀಲಂಕಾ ಮತ್ತು ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ) ಸೇರಿದಂತೆ ಏಳು ವಿದೇಶಿ ರಾಷ್ಟ್ರಗಳು ಭಾಗವಹಿಸುತ್ತಿವೆ ಎಂದು ವರದಿಯಾಗಿದೆ.

  ಈ ಸಮರಾಭ್ಯಾಸದ ಪ್ರಮುಖ ಆಕರ್ಷಣೆಗಳಲ್ಲಿ ಅಮೆರಿಕದ ಎಫ್‌-35 ಬಹುಪಾತ್ರದ ಸ್ಟೆಲ್ತ್ ಯುದ್ಧ ವಿಮಾನದ ಭಾಗವಹಿಸುವಿಕೆಯೂ ಒಂದಾಗಿದೆ. ಬಹುರಾಷ್ಟ್ರೀಯ ವಾಯು ಸಮರಾಭ್ಯಾಸದಲ್ಲಿ ಈ ವಿಮಾನ ಮೊದಲ ಬಾರಿಗೆ ಪಾಲ್ಗೊಳ್ಳುತ್ತಿದೆ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ. ಭಾರತದ ಸ್ವದೇಶಿ ಲಘು ಯುದ್ಧ ವಿಮಾನವಾದ ತೇಜಸ್, ದೇಶದ ರಕ್ಷಣಾ ಉತ್ಪಾದನಾ ಸಾಮರ್ಥ್ಯ ಮತ್ತು ವಾಯುಯಾನ ತಂತ್ರಜ್ಞಾನದ ಪ್ರಮುಖ ಸಂಕೇತವಾಗಿದೆ. ಈ ವಿಮಾನದ ಮೂಲಕ ಎಪಿ ಸಿಂಗ್ ನಡೆಸಿದ ಕೊನೆಯ ಯುದ್ಧ ವಿಮಾನ ಹಾರಾಟವು ಸ್ವದೇಶಿ ರಕ್ಷಣಾ ತಂತ್ರಜ್ಞಾನದ ಮಹತ್ವವನ್ನೂ ಮುನ್ನೆಲೆಗೆ ತಂದಿದೆ.

  ‘ತರಂಗ್ ಶಕ್ತಿ’ಯಂತಹ ಬಹುರಾಷ್ಟ್ರೀಯ ಸಮರಾಭ್ಯಾಸಗಳು ವಿವಿಧ ದೇಶಗಳ ವಾಯುಪಡೆಗಳ ನಡುವಿನ ಸಮನ್ವಯ, ಕಾರ್ಯಾಚರಣಾ ಸಾಮರ್ಥ್ಯ ಮತ್ತು ಪರಸ್ಪರ ಸಹಕಾರವನ್ನು ಹೆಚ್ಚಿಸುವ ಉದ್ದೇಶ ಹೊಂದಿವೆ. ವಿವಿಧ ದೇಶಗಳ ಯುದ್ಧ ವಿಮಾನಗಳು ಒಂದೇ ವೇದಿಕೆಯಲ್ಲಿ ಪಾಲ್ಗೊಳ್ಳುವುದರಿಂದ ಕಾರ್ಯತಂತ್ರದ ಅನುಭವ ವಿನಿಮಯಕ್ಕೂ ಅವಕಾಶ ದೊರೆಯುತ್ತದೆ. ಅಕ್ಟೋಬರ್ 31ರಂದು ನಿವೃತ್ತರಾಗಲಿರುವ ಎಪಿ ಸಿಂಗ್ ಅವರ ಈ ಹಾರಾಟವು, ಯುದ್ಧ ಪೈಲಟ್ ಆಗಿ ಅವರ ಸುದೀರ್ಘ ವೃತ್ತಿಜೀವನದ ಮಹತ್ವದ ಮೈಲಿಗಲ್ಲಾಗಿ ಗುರುತಿಸಿಕೊಂಡಿದೆ.

  A FINAL FIGHTER SORTIE. A LIFETIME OF PASSION. At the controls of the indigenous Tejas, the Chief of the Air Staff, Air Chief Marshal AP Singh, takes to the skies for his last fighter sortie — a defining moment in a distinguished career shaped by an abiding passion for flying and an unwavering commitment to serving the Nation. Flying alongside Friendly Foreign Country aircraft and the Suryakiran Aerobatic Team during Exercise #TarangShakti26, the sortie reflects the spirit of a fighter pilot who has always believed in leading from the front. As one chapter draws to a close, the passion remains undiminished. The skies may mark the end of a flying chapter, but the mission of service to the Nation continues. Once a fighter pilot. Always a fighter pilot. #IndianAirForce #PowerInPartnership #Tejas #TarangShakti26 @ausairforce @armeedelair @usairforce @team_luftwaffe @modgovae @defenceminindia @HQ_IDS_India @careeriniaf @air_veterans

  — Indian Air Force (@IAF_MCC) October 12, 2026