ಅದಕ್ಷ, ಹೇಡಿ, ಪುಕ್ಕಲು ಪ್ರಧಾನಿ, 'ದೇಶದ ದುರ್ದೈವ' - ಕಾಂಗ್ರೆಸ್ ಟೀಕೆ

•   Thu, Apr 25 2019 03:29:20 PM



• ಬೆಂಗಳೂರು,ಏ 25(Daijiworld News/MSP): ಪತ್ರಕರ್ತರಿಗೆ ಸಂದರ್ಶನ ಕೊಡಲು ಧೈರ್ಯ ಸಾಲದೆ ನಟನೊಂದಿಗೆ ಚಿತ್ರೀಕರಿಸಿದ ಸಂದರ್ಶನ ರೂಪದ ವಿಡಿಯೋವನ್ನು ಮಾಧ್ಯಮಗಳಿಗೆ ಬಿಡುಗಡೆಗೊಳಿಸಲಾಗಿದ್ದು, ಪತ್ರಕರ್ತರನ್ನು ಎದುರಿಸಲಾಗದ ನರೇಂದ್ರ ಮೋದಿ ಒಬ್ಬ ಪುಕ್ಕಲು ಪ್ರಧಾನಿ ಎಂದು ಕಾಂಗ್ರೆಸ್ ಜರೆದಿದೆ.

  

  ಬಾಲಿವುಡ್ ನಟ ಅಕ್ಷಯ್ ಕುಮಾರ್ ಅವರಿಗೆ ನೀಡಿದ ಸಂದರ್ಶನದಲ್ಲಿ ನರೇಂದ್ರ ಮೋದಿ ಅಪರೂಪದ ಖಾಸಗಿ ಬದುಕಿನ ಮಾಹಿತಿಗಳನ್ನು ಹಂಚಿಕೊಂಡಿದ್ದು, ಅದರಲ್ಲಿ ರಾಜಕೀಯೇತರ, ಲೋಕಭಿರಾಮ, ಮಾತುಕತೆ ನಡೆಸಿದ್ದರು. ಈ ಸಂದರ್ಶನ ವೈರಲ್ ಆಗಿತ್ತು.

  ಈ ಬಗ್ಗೆ ಕರ್ನಾಟಕ ಕಾಂಗ್ರೆಸ್ ಟ್ವೀಟ್ ಮಾಡಿ ’ಕೇವಲ ಸೆಲೆಬ್ರೆಟಿಗಳ ಜೊತೆ ಮಾತ್ರ ಸಂದರ್ಶನದಲ್ಲಿ ಪಾಲ್ಗೊಳ್ಳಲು ಮತ್ತು ಸೆಲ್ಫಿ ಕ್ಲಿಕ್ಕಿಸಿ ಕೊಳ್ಳಲು ಆಸಕ್ತಿ ತೋರುವ ನಮ್ಮ ಪ್ರಧಾನಿ ನರೇಂದ್ರ ಮೋದಿ ಅವರು, ಇಲ್ಲಿಯವರೆಗೆ ಒಂದೇ ಒಂದು ಮಾಧ್ಯಮದ ಗೋಷ್ಠಿಯಲ್ಲಿ ಪಾಲ್ಗೊಂಡಿಲ್ಲ ಮತ್ತು ದೇಶದ ಸಮಸ್ಯೆಗಳ ಕುರಿತು ಮಾತನಾಡಿಲ್ಲ. ಅಷ್ಟರ ಮಟ್ಟಿಗೆ ಈತ ಅದಕ್ಷ ಹಾಗು ಹೇಡಿ ಎಂದು ನಾವು ಹೇಳಬಹುದು ಎಂದು ಮೋದಿ ವಿರುದ್ದ ಕಿಡಿಕಾರಿದ್ದಾರೆ.

  ಐವತ್ತಾರು ಇಂಚಿನ ಎದೆಯುಳ್ಳ ಮನುಷ್ಯ ಹೆದರಿಕೆಯನ್ನು ಬಿಡಬೇಕು. ಪತ್ರಕರ್ತರಿಗೆ ಸಂದರ್ಶನ ಕೊಡಲು ಧೈರ್ಯ ಸಾಲದೆ ಒಬ್ಬ ನಟನೊಂದಿಗೆ ಚಿತ್ರೀಕರಿಸಿದ ಸಂದರ್ಶನ ರೂಪದ ವಿಡಿಯೋವನ್ನು ಮಾಧ್ಯಮಗಳಿಗೆ ಬಿಡುಗಡೆಗೊಳಿಸಲಾಗಿದೆ.ಪತ್ರಕರ್ತರಿಗೆ, ಪತ್ರಿಕಾಗೋಷ್ಠಿಗೆ ಹೆದರುವ ಪುಕ್ಕಲು ಪ್ರಧಾನಿ, ದೇಶದ ದುರ್ದೈವ ಎಂದು ಟೀಕಿಸಿದೆ.