ಬರೋಬ್ಬರಿ 32 ಕೋಟಿ ರೂ. ಭವ್ಯ ಬಂಗಲೆಯ ಗೃಹಪ್ರವೇಶಕ್ಕೆ ವಿರುಷ್ಕಾ ದಂಪತಿ ಸಿದ್ಧತೆ

•   Thu, Jan 16 2025 12:36:02 PM



• ಮುಂಬೈ, ಜ.16 (DaijiworldNews/AA): ಟೀಂ ಇಂಡಿಯಾದ ಸ್ಟಾರ್ ಆಟಗಾರ ವಿರಾಟ್ ಕೊಹ್ಲಿ ಹಾಗೂ ಬಾಲಿವುಡ್ ನಟು ಅನುಷ್ಕಾ ಶರ್ಮಾ ದಂಪತಿ ದಕ್ಷಿಣ ಮುಂಬೈನ ಅಲಿಬಾಗ್‌ನಲ್ಲಿ ನೂತನ ಮನೆ ನಿರ್ಮಿಸಿದ್ದು, ಹೊಸ ಮನೆಯ ಗೃಹಪ್ರವೇಶದ ಸಿದ್ಧತೆಯಲ್ಲಿದ್ದಾರೆ. ಇದೇ ವಾರ ಹೊಸ ಮನೆಯ ಗೃಹ ಪ್ರವೇಶ ನಡೆಯಲಿದೆ ಎಂದು ತಿಳಿದುಬಂದಿದೆ.

  2022 ರಲ್ಲಿ ವಿರಾಟ್ ಕೊಹ್ಲಿ ಅಲಿಬಾಗ್‌ನಲ್ಲಿ 19 ಕೋಟಿ ರೂ.ಗೆ 8 ಎಕರೆ ಜಾಗವನ್ನು ಖರೀದಿ ಮಾಡಿದ್ದರು. ಇದೀಗ ಅದೇ ಜಾಗದಲ್ಲಿ ತಮ್ಮ ಹೊಸ ಮನೆಯನ್ನು ನಿರ್ಮಿಸಿದ್ದಾರೆ. ವರದಿಯ ಪ್ರಕಾರ ಹೆಸರಾಂತ SAOTA (ಸ್ಟೀಫನ್ ಆಂಟೋನಿ ಒಲ್ಮೆಸ್‌ಡಾಲ್ ಟ್ರೂಯೆನ್ ಆರ್ಕಿಟೆಕ್ಟ್ಸ್) ವಿನ್ಯಾಸಗೊಳಿಸಿದ ಶೈಲಿಯಲ್ಲಿ ವಿರಾಟ್ ಕೊಹ್ಲಿಯ ನೂತನ ಮನೆಯನ್ನು ನಿರ್ಮಿಸಲಾಗಿದೆ.

  ಈ ಭವ್ಯ ಬಂಗಲೆಯೊಂದಿಗೆ ತಾಪಮಾನ-ನಿಯಂತ್ರಿತ ಸ್ಮಿಮ್ಮಿಂಗ್ ಪೂಲ್, ಜಕುಝಿ, ಬೆಸ್ಪೋಕ್ ಅಡುಗೆಮನೆ, ವಿಶಾಲವಾದ ಉದ್ಯಾನವನ ನಿರ್ಮಿಸಲಾಗಿದೆ. ಜೊತೆಗೆ ಒಳಾಂಗಣವನ್ನು ಇಟಾಲಿಯನ್ ಅಮೃತಶಿಲೆ, ಟರ್ಕಿಶ್ ಸುಣ್ಣದ ಕಲ್ಲು ಮತ್ತು ಪ್ರಾಚೀನ ಕಲ್ಲುಗಳನ್ನು ಬಳಸಿ ವಿನ್ಯಾಸಗೊಳಿಸಲಾಗಿದೆ.

  ಈ ಬಂಗಲೆ 7,171 ಚದರ ಅಡಿಗಳನ್ನು ವ್ಯಾಪಿಸಿದೆ. ಅಲ್ಲದೆ ತಮ್ಮ ಈ ಭವ್ಯ ಬಂಗಲೆಗಾಗಿ ವಿರಾಟ್ ಕೊಹ್ಲಿ ಬರೋಬ್ಬರಿ 32 ಕೋಟಿ ರೂ. ಖರ್ಚು ಮಾಡಿದ್ದಾರೆ ಎನ್ನಲಾಗಿದೆ. ಸದ್ಯ ಗೃಹ ಪ್ರವೇಶಕ್ಕಾಗಿ ವಿರಾಟ್ ಕೊಹ್ಲಿಯ ಹೊಸ ಮನೆಯ ಬಾಗಿಲುಗಳನ್ನು ಹೂವುಗಳಿಂದ ಅಲಂಕರಿಸಲ್ಪಟ್ಟ ವಿಡಿಯೋಗಳು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದೆ.