ರಾಹುಲ್ ದ್ರಾವಿಡ್ ಪುತ್ರನಿಗೆ ಒಲಿದ ಕರ್ನಾಟಕ ತಂಡದ ನಾಯಕತ್ವ

•   Tue, Oct 07 2025 10:32:39 AM



• ಬೆಂಗಳೂರು, ಅ. 07 (DaijiworldNews/TA): ಭಾರತದ ಮಾಜಿ ಕ್ರಿಕೆಟ್ ಆಟಗಾರ ಹಾಗೂ "ದ ವಾಲ್" ಎಂದು ಪ್ರಸಿದ್ಧರಾದ ರಾಹುಲ್ ದ್ರಾವಿಡ್ ಅವರ ಕಿರಿಯ ಪುತ್ರ ಅನ್ವಯ್ ದ್ರಾವಿಡ್ ಅವರಿಗೆ ಕರ್ನಾಟಕ ಅಂಡರ್-19 ಕ್ರಿಕೆಟ್ ತಂಡದ ನಾಯಕತ್ವ ಒಲಿದಿದೆ. ಶಾಂತ ಸ್ವಭಾವ, ನಿರಂತರ ಶ್ರೇಷ್ಠ ಪ್ರದರ್ಶನ ಮತ್ತು ನಿರ್ಧಾರಾಕ್ಷಮತೆಗಳನ್ನು ಹೊಂದಿರುವ ಅನ್ವಯ್, ಭಾನುವಾರ "ಅತ್ಯುತ್ತಮ ಕಿರಿಯ ಬ್ಯಾಟರ್" ಪ್ರಶಸ್ತಿಗೆ ಪಾತ್ರರಾಗಿದ್ದರು, ಈಗ ರಾಜ್ಯದ ಜೂನಿಯರ್ ಕ್ರಿಕೆಟ್ ತಂಡವನ್ನು ಮುನ್ನಡೆಸುವ ಪ್ರಮುಖ ಜವಾಬ್ದಾರಿಯನ್ನೂ ತನ್ನದಾಗಿಸಿಕೊಂಡಿದ್ದಾರೆ.

  

  ಅನ್ವಯ್ ದ್ರಾವಿಡ್ ನಾಯಕತ್ವದ ಕರ್ನಾಟಕ ತಂಡವು ಅಕ್ಟೋಬರ್ 9 ರಿಂದ 17 ರವರೆಗೆ ಡೆಹ್ರಾಡೂನ್‌ನಲ್ಲಿ ನಡೆಯಲಿರುವ ಪ್ರತಿಷ್ಠಿತ ವಿನೂ ಮಂಕಡ್ ಟ್ರೋಫಿ ಟೂರ್ನಿಯಲ್ಲಿ ಭಾಗವಹಿಸಲಿದ್ದು, ಈ ಟೂರ್ನಿಯಲ್ಲಿಯೇ ಅನ್ವಯ್ ತಮ್ಮ ನಾಯಕತ್ವ ಸಾಮರ್ಥ್ಯವನ್ನು ಸಾಧಿಸಬೇಕಾಗಿದೆ. ವಿಶೇಷವೆಂದರೆ, ಅವರು ಕೇವಲ ಬ್ಯಾಟರ್ ಅಲ್ಲದೆ ವಿಕೆಟ್ ಕೀಪರ್ ಆಗಿಯೂ ಕಣಕ್ಕಿಳಿಯಲಿದ್ದಾರೆ. ಹೀಗಾಗಿ ನಾಯಕತ್ವದ ಜವಾಬ್ದಾರಿ ಜೊತೆಗೆ ಕೀಪಿಂಗ್ ಹೊಣೆಗಾರಿಕೆ ಕೂಡ ಅನ್ವಯ್ ಮೆಟ್ಟಿಲು ಏರಬೇಕಾದ ಪರೀಕ್ಷೆಯಂತಿದೆ.

  ಇತ್ತೀಚೆಗಿನ ವಿಜಯ್ ಮರ್ಚೆಂಟ್ ಟ್ರೋಫಿಯಲ್ಲಿ ಅವರು ಕರ್ನಾಟಕ ಅಂಡರ್-16 ತಂಡದ ಪರ 8 ಇನಿಂಗ್ಸ್‌ಗಳಲ್ಲಿ 459 ರನ್ ಕಲೆಹಾಕಿ ರಾಜ್ಯದ ಟಾಪ್ ಸ್ಕೋರ್‌ ಆಗಿದ್ದರು. ಈ ರನ್‌ಗಳ ನಡುವೆ ಎರಡು ಭರ್ಜರಿ ಶತಕಗಳು, 48 ಬೌಂಡರಿ ಹಾಗೂ ಸಿಕ್ಸರ್‌ಗಳೊಂದಿಗೆ 91.80ರ ಸರಾಸರಿಯಲ್ಲಿ ಅವರು ಮೆರೆದಿದ್ದಾರೆ. ಇದರ ಪ್ರತಿಫಲವಾಗಿ, ಕರ್ನಾಟಕ ರಾಜ್ಯ ಕ್ರಿಕೆಟ್ ಸಂಸ್ಥೆ ವಾರ್ಷಿಕ ಪ್ರಶಸ್ತಿಯಲ್ಲಿ "ಅತ್ಯುತ್ತಮ ಕಿರಿಯ ಬ್ಯಾಟರ್" ಪ್ರಶಸ್ತಿ ನೀಡಿ ಮತ್ತೆ ಗೌರವಿಸಿತು. ಕಳೆದ ವರ್ಷವೂ 357 ರನ್ ಗಳಿಸಿ ಇದೇ ಪ್ರಶಸ್ತಿಯನ್ನು ಪಡೆದಿದ್ದರು.

  ಸ್ಥಿರತೆಯ ಪ್ರದರ್ಶನ ಹಾಗೂ ಶ್ರೇಷ್ಟ ಕ್ರಿಕೆಟ್‌ ದಕ್ಷತೆಯಿಂದಾಗಿ ಅನ್ವಯ್ ದ್ರಾವಿಡ್‌ ಈಗ ಕರ್ನಾಟಕ ಅಂಡರ್-19 ತಂಡದ ನಾಯಕರಾಗಿ ಆಯ್ಕೆಯಾಗಿದ್ದಾರೆ. ಇದು ಅವರನ್ನು ನೇರವಾಗಿ ರಾಜ್ಯ ಮಟ್ಟದ ಕ್ರಿಕೆಟ್‌ನಿಂದ ರಾಷ್ಟ್ರ ಮಟ್ಟದ ಕ್ರಿಕೆಟ್‌ಗೆ ದಾರಿ ಮಾಡುವಲ್ಲಿ ಬಲವಾದ ಹಂತವಾಗಿದೆ ಎನ್ನಲಾಗಿದೆ. ವಿನೂ ಮಂಕಡ್ ಟೂರ್ನಿಯಲ್ಲಿ ಅವರು ತಂಡವನ್ನು ಯಶಸ್ವಿಯಾಗಿ ಮುನ್ನಡೆಸಿದರೆ, ಭವಿಷ್ಯದ ರಣಜಿ ತಂಡ ಹಾಗೂ ಇತರ ಹಿರಿಯ ಮಟ್ಟದ ಆಯ್ಕೆಗಳಿಗೆ ಇದು ಪೂರಕವಾಗಲಿದೆ.

  ವಿನೂ ಮಂಕಡ್ ಟ್ರೋಫಿಗೆ ಕರ್ನಾಟಕ ಅಂಡರ್-19 ತಂಡ ಈ ಕೆಳಗಿನಂತಿದೆ: ಅನ್ವಯ್ ದ್ರಾವಿಡ್ (ನಾಯಕ, ವಿಕೆಟ್ ಕೀಪರ್), ನಿತೀಶ್ ಆರ್ಯ, ಆದರ್ಶ್ ಡಿ ಅರಸ್, ಎಸ್ ಮಣಿಕಾಂತ್ (ಉಪನಾಯಕ), ಪ್ರಣೀತ್ ಶೆಟ್ಟಿ, ವಾಸವ್ ವೆಂಕಟೇಶ್, ಅಕ್ಷತ್ ಪ್ರಭಾಕರ್, ಸಿ ವೈಭವ್, ಕುಲದೀಪ್ ಸಿಂಗ್ ಪುರೋಹಿತ್, ರತನ್ ಬಿಆರ್, ವೈಭವ್ ಶರ್ಮಾ, ಕೆಎ ತೇಜಸ್, ಅಥರ್ವ್ ಮಾಳವಿಯಾ, ಸನ್ನಿ ಕಾಂಚಿ, ರೆಹಾನ್ ಮೊಹಮ್ಮದ್ (ವಿಕೆಟ್ ಕೀಪರ್).