ನವದೆಹಲಿ: ಗೆಳತಿ ನತಾಶಾ ಜೊತೆ ಹಾರ್ದಿಕ ಪಾಂಡ್ಯ ನಿಶ್ಚಿತಾರ್ಥ

•   Thu, Jan 02 2020 06:28:34 PM



• ನವದೆಹಲಿ, ಜ 02 (DaijiworldNews/SM): ಟೀಮ್ ಇಂಡಿಯಾ ಆಲ್ರೌಂಡರ್ ಹಾರ್ದಿಕ್ ಪಾಂಡ್ಯ ೨೦-೨೦ಯ ಆರಂಭದಲ್ಲೇ ಅಭಿಮಾನಿಗಳಿಗೆ ಸಿಹಿ ಸುದ್ದಿಯೊಂದನ್ನು ನೀಡಿದ್ದಾರೆ. ಗೆಳತಿ ನತಾಶಾ ಸ್ಟಾಂಕೋವಿಕ್ ಜತೆಗೆ ನಿಶ್ಚಿತಾರ್ಥ ಮಾಡಿಕೊಳ್ಳುವ ಮೂಲಕ ಪಾಂಡ್ಯ ಹೊಸ ವರ್ಷಾರಂಭದಲ್ಲೇ ವೈವಾಹಿಕ ಜೀವನಕ್ಕೆ ಕಾಲಿಡಲು ಸಜ್ಜಾಗಿದ್ದಾರೆ.

  

  ಕನ್ನಡದ ‘ದನ ಕಾಯೋನು’ ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದ ಸೆರ್ಬಿಯಾ ಮೂಲದ ಬಾಲಿವುಡ್ ನಟಿ ನತಾಶಾ ಸ್ಟಾಂಕೋವಿಕ್ ಜೊತೆಗೆ ನಿಶ್ಚಿತಾರ್ಥ ಮಾಡಿಕೊಂಡಿರುವ ಬಗ್ಗೆ ಹಾರ್ದಿಕ್ ಪಾಂಡ್ಯ ತನ್ನ ಇನ್ಸ್ಟ್ರಾಗ್ರಾಮ್ ಪೇಜ್ ನಲ್ಲಿ ಪ್ರಕಟಿಸಿದ್ದಾರೆ.

  ‘ಮೈ ತೆರಾ, ತು ಮೇರಿ, ಜಾನೇ ಸಾರಾ ಹಿಂದುಸ್ತಾನ್. 01.01.2020, ಎಂಗೇಜ್ಡ್’ ಎಂದು ಹಾರ್ದಿಕ್ ಪಾಂಡ್ಯ ಬುಧವಾರ ಸಂಜೆ ಇನ್​ಸ್ಟಾಗ್ರಾಂ ಪೋಸ್ಟ್​ನಲ್ಲಿ ನಿಶ್ಚಿತಾರ್ಥವನ್ನು ಪ್ರಕಟಿಸಿದ್ದಾರೆ. ಇದರ ಬೆನ್ನಲ್ಲೇ ಕ್ರಿಕೆಟ್ ತಾರೆಯರಿಂದ ಮತ್ತು ಅಭಿಮಾನಿಗಳಿಂದ ಅಭಿನಂದನೆಗಳ ಮಹಾಪೂರ ಹರಿದು ಬಂದಿದೆ. ದುಬೈನಲ್ಲಿ ವಿಹಾರ ದೋಣಿಯೊಂದರಲ್ಲಿ ಇವರಿಬ್ಬರ ನಿಶ್ಚಿತಾರ್ಥ ನಡೆದಿದೆ ಎನ್ನಲಾಗಿದೆ. ಪಾಂಡ್ಯ-ನತಾಶಾ ಆಪ್ತರು ಮಾತ್ರ ಸಮಾರಂಭದಲ್ಲಿದ್ದರು. ಇದರ ಬೆನ್ನಲ್ಲೇ, ದೋಣಿಯಲ್ಲಿ ಪಾಂಡ್ಯ ಮೊಣಕಾಲೂರಿ ಪ್ರಪೋಸ್ ಮಾಡಿರುವ ಮತ್ತು ಪಾಂಡ್ಯ ತುಟಿಗೆ ಮುತ್ತಿಟ್ಟು ನತಾಶಾ ಒಪ್ಪಿಕೊಂಡಿರುವ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಪಾಂಡ್ಯ ತೊಡಿಸಿದ ಉಂಗುರದ ಜತೆಗೆ ನತಾಶಾ ಸೆಲ್ಪಿ ಕೂಡ ಕ್ಲಿಕ್ಕಿಸಿಕೊಂಡಿದ್ದಾರೆ.

  ಭಾರತ ಪರ 11 ಟೆಸ್ಟ್, 54 ಏಕದಿನ, 40 ಟಿ20 ಪಂದ್ಯಗಳನ್ನು ಆಡಿರುವ ಪಾಂಡ್ಯ ಗಾಯದ ಸಮಸ್ಯೆಯಿಂದಾಗಿ ಕಳೆದ ಸೆಪ್ಟೆಂಬರ್​ನಿಂದ ಅಂತಾರಾಷ್ಟ್ರೀಯ ಕ್ರಿಕೆಟ್​ನಿಂದ ದೂರವಿದ್ದಾರೆ. ಮುಂಬರುವ ನ್ಯೂಜಿಲೆಂಡ್‌ ಪ್ರವಾಸಕ್ಕೆ ಭಾರತ ‘ಎ’ ತಂಡದ ಮೂಲಕ ಮರಳಲು ಎದುರು ನೋಡುತ್ತಿದ್ದಾರೆ.

  ದನ ಕಾಯೋನು ಸಿನಿಮಾದಲ್ಲಿ ನಟನೆ!

  2014ರಲ್ಲಿ ಹಿಂದಿ ಬಿಗ್​ಬಾಸ್ 8ನೇ ಆವೃತ್ತಿಯಲ್ಲಿ ಕಾಣಿಸಿಕೊಂಡು ಜನಪ್ರಿಯತೆ ಪಡೆದಿದ್ದ ನತಾಶಾ ಸ್ಟಾಂಕೋವಿಕ್, ‘ದನ ಕಾಯೋನು’ ಕನ್ನಡ ಸಿನಿಮಾದ ಹಾಡೊಂದರಲ್ಲೂ ಕುಣಿದಿದ್ದರು. ಸೆರ್ಬಿಯಾ ಪ್ರಜೆಯಾಗಿದ್ದರೂ 2012ರಿಂದ ಮುಂಬೈನಲ್ಲಿ ನೆಲೆಸಿರುವ ನತಾಶಾ, ಆರಂಭದಲ್ಲಿ ರೂಪದರ್ಶಿಯಾಗಿದ್ದರು. 2013ರಲ್ಲಿ ಸತ್ಯಾಗ್ರಹ ಸಿನಿಮಾದ ಹಾಡಿನಲ್ಲಿ ಕುಣಿಯುವ ಮೂಲಕ ಬಾಲಿವುಡ್ ಪ್ರವೇಶಿಸಿದ್ದರು.