'ಆರ್‌ಪಿ ಎಂಬವರು ನನಗಾಗಿ ಕಾದಿದ್ದರು'-ನಟಿ ಊರ್ವಶಿ ರೌಟೇಲ ಹೇಳಿಕೆಗೆ ರಿಷಬ್ ಪಂತ್ ಗರಂ

•   Fri, Aug 12 2022 11:24:15 AM



• ಮುಂಬೈ, ಆ 12 (DaijiworldNews/DB): ಸಂದರ್ಶನವೊಂದರಲ್ಲಿ ಆರ್‌ಪಿ ಎಂಬ ಭಾರತೀಯ ಸೆಲೆಬ್ರಿಟಿ ವ್ಯಕ್ತಿಯೊಬ್ಬರು ಹೊಟೇಲ್‌ನಲ್ಲಿ ನನಗಾಗಿ ಕಾದಿದ್ದರು. ಅಲ್ಲದೆ ನಾನು ಮಲಗಿದ್ದ ವೇಳೆ 16 ರಿಂದ 17 ಮಿಸ್ ಕಾಲ್ ನೀಡಿದ್ದ ಎಂದು ಸಂದರ್ಶನವೊಂದರಲ್ಲಿ ಹೇಳಿಕೆ ನೀಡಿದ್ದ ಬಾಲಿವುಡ್ ನಟಿ ಊರ್ವಶಿ ರೌಟೇಲ ವಿರುದ್ದ ಕ್ರಿಕೆಟಿಗ ರಿಷಬ್ ಪಂತ್ ಗರಂ ಆಗಿದ್ದಾರೆ. ಕೆಲವರು ಪ್ರಚಾರ ಮತ್ತು ಜನಪ್ರಿಯತೆಗಾಗಿ ಸುಳ್ಳು ಹೇಳುತ್ತಾರೆ ಎಂದು ತಮ್ಮ ಇನ್‌ಸ್ಟಾಗ್ರಾಂನಲ್ಲಿ ಬರೆದುಕೊಂಡು ಬಳಿಕ ಡಿಲೀಟ್ ಮಾಡಿದ್ದಾರೆ.

  ನಟಿ ಊರ್ವಶಿ ರೌಟೇಲ ಅವರು ಇತ್ತೀಚೆಗೆ ಸಂದರ್ಶನವೊಂದರಲ್ಲಿ ಮಾತನಾಡುವಾಗ ಆರ್‌ಪಿ ಎಂಬ ಭಾರತೀಯ ಸೆಲೆಬ್ರಿಟಿಯೊಬ್ಬರು ನನಗಾಗಿ ದೆಹಲಿಯ ಹೊಟೇಲ್‌ನಲ್ಲಿ ಗಂಟೆಗಟ್ಟಲೆ ಕಾದಿದ್ದರು ಎಂದಿದ್ದರು. ಆರ್‌ಪಿ ಎಂಬ ಸೆಲೆಬ್ರಿಟಿ ರಿಷಬ್ ಪಂತ್ ಬಿಟ್ಟರೆ ಭಾರತದಲ್ಲಿ ಬೇರಾರಿಲ್ಲದ ಕಾರಣ ನೆಟ್ಟಿಗರು ಪಂತ್ ಮತ್ತು ಊರ್ವಶಿ ನಡುವೆ ಏನೋ ಇದೆ ಎಂದೇ ಭಾವಿಸಿದ್ದರು. ಅಲ್ಲದೆ ಸಾಮಾಜಿಕ ಜಾಲತಾಣದಲ್ಲಿಯೂ ತರಹೇವಾರಿ ಕಾಮೆಂಟ್‌ಗಳು ಬಂದಿದ್ದವು. ಇದರಿಂದ ಗರಂ ಆದ ರಿಷಬ್ ಪಂತ್, ಊರ್ವಶಿ ವಿರುದ್ದ ತಮ್ಮ ಇನ್‌ಸ್ಟಾಗ್ರಾಂ ಖಾತೆಯಲ್ಲಿ ಪರೋಕ್ಷವಾಗಿ ಬರೆದುಕೊಂಡಿದ್ದರು. ಕೆಲವರು ಜನಪ್ರಿಯತೆ ಮತ್ತು ಪ್ರಚಾರಕ್ಕಾಗಿ ಸುಳ್ಳು ಹೇಳುತ್ತಾರೆ ಎಂದು ಊರ್ವಶಿಗೆ ಟಾಂಗ್ ಕೊಟ್ಟಿದ್ದರು. ಇದಕ್ಕೆ ಹಲವರು ಕಾಮೆಂಟ್ ಮಾಡಿದ್ದರು. ಬಳಿಕ ಪಂತ್ ಈ ಪೋಸ್ಟ್‌ನ್ನು ಅಳಿಸಿ ಹಾಕಿದ್ದರು.

  2018ರಲ್ಲಿ ರಿಷಬ್ ಪಂತ್ ಮತ್ತು ಊರ್ವಶಿ ರೌಟೇಲ ಸಾರ್ವಜನಿಕ ಸ್ಥಳಗಳಲ್ಲಿ ಒಟ್ಟಿಗೆ ಕಾಣಿಸಿಕೊಂಡಿದ್ದರು. ಹೀಗಾಗಿ ಅಭಿಮಾನಿಗಳು ಇವರಿಬ್ಬರು ಪ್ರೀತಿಸುತ್ತಿದ್ದಾರೆಂದೇ ಭಾವಿಸಿದ್ದರು. ಬಳಿಕ ಇಬ್ಬರೂ ಕೂಡಾ ನಾವು ಡೇಟಿಂಗ್ ಮಾಡುತ್ತಿಲ್ಲ, ಪ್ರೀತಿಯಲ್ಲಿ ಬಿದ್ದಿಲ್ಲ ಎಂದು ಸ್ಪಷ್ಟಪಡಿಸಿದ್ದರು. ಅಲ್ಲದೆ ನಟಿ ಇಶಾ ನೇಗಿ ಅವರೇ ತನ್ನ ಗೆಳತಿ ಎಂದು ಸಾರ್ವಜನಿಕವಾಗಿ ಪಂತ್ ಹೇಳಿಕೊಂಡಿದ್ದರು. ಆದರೆ ಇದೀಗ ಊರ್ವಶಿ ಹೇಳಿಕೆ ನೋಡಿದಾಗ ಇಬ್ಬರ ನಡುವೆ ಏನೋ ಸಮಸ್ಯೆಯಾಗಿದೆ ಎಂಬುದನ್ನು ತಿಳಿಸುವಂತಿದೆ ಎನ್ನುತ್ತಾರೆ ಅಭಿಮಾನಿಗಳು. ಅಲ್ಲದೆ ಸುಖಾಸುಮ್ಮನೆ ಮಾತನಾಡುವುದರಿಂದ ಕ್ರಿಕೆಟಿಗ ಪಂತ್‌ ವೃತ್ತಿ ಜೀವನದ ಮೇಲೆ ಪರಿಣಾಮ ಬೀರುತ್ತದೆ ಎಂದೂ ಕೆಲವು ಕ್ರಿಕೆಟ್ ಅಭಿಮಾನಿಗಳು ಊರ್ವಶಿ ವಿರುದ್ದ ಆಕ್ರೋಶ ಹೊರ ಹಾಕಿದ್ದಾರೆ.