ವಿಶ್ವಕಪ್ ನಲ್ಲಿ ಪಾಕ್ ಜತೆ ಭಾರತ ಆಡಬಾರದು: ಹರ್ಭಜನ್ ಸಿಂಗ್

•   Tue, Feb 19 2019 10:03:42 PM



• ನವದೆಹಲಿ, ಫೆ 19(SM): ಜಮ್ಮು-ಕಾಶ್ಮೀರದ ಪುಲ್ವಾಮಾದಲ್ಲಿ ನಡೆದ ಉಗ್ರರ ಭೀಕರ ದಾಳಿ ಬಳಿಕ ಎಲ್ಲರೂ ಪಾಕ್​ ವಿರುದ್ಧ ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ. ಉಗ್ರರು ದಾಳಿ ನಡೆಸಲು ಕುಮ್ಮಕ್ಕು ನೀಡುತ್ತಿರುವ ನೆರೆಯ ರಾಷ್ಟ್ರದೊಂದಿಗೆ ಭಾರತ ಯಾವುದೇ ರೀತಿಯ ಸಂಬಂಧ ಇಟ್ಟುಕೊಳ್ಳಬಾರದು ಎಂಬುವುದು ಎಲ್ಲರ ಬಾಯಿಯಿಂದ ಕೇಳಿಬರುವ ಮಾತು. ಇನ್ನೆರಡು ತಿಂಗಳ ಬಳಿಕ ಆರಂಭಗೊಳ್ಳಲಿರುವ ವಿಶ್ವಕಪ್​​ನಲ್ಲಿ ಭಾರತ ತಂಡ ಪಾಕಿಸ್ತಾನದೊಂದಿಗೆ ಆಡಬಾರದು ಎಂಬ ಮಾತುಗಳು ಕೇಳಿ ಬರುತ್ತಿದೆ. ಅದಕ್ಕೆ ಪುಷ್ಠಿ ಎಂಬಂತೆ ಟೀಂ ಇಂಡಿಯಾದ ಹಿರಿಯ ಆಟಗಾರ ಹರ್ಭಜನ್​ ಸಿಂಗ್​ ಧ್ವನಿಗೂಡಿಸಿದ್ದಾರೆ.

  

  ಟೀಂ ಇಂಡಿಯಾ ವಿಶ್ವಕಪ್​​ನಲ್ಲಿ ಯಾವುದೇ ಕಾರಣಕ್ಕೂ ಪಾಕ್​ನೊಂದಿಗೆ ಕ್ರಿಕೆಟ್ ಆಡಬಾರದು. ಪಾಕ್​​ನೊಂದಿಗೆ ಆಡದೇ ಭಾರತ ವಿಶ್ವಕಪ್​ ಗೆಲ್ಲುವ ಪ್ರಬಲ ತಂಡವಾಗಿದೆ ಎಂದು ಹರ್ಭಜನ್ ಸಿಂಗ್ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ನಮ್ಮ ದೇಶಕ್ಕೆ ಅನ್ಯಾಯ ಮಾಡಿದವ ಜತೆ ಯಾವುದೇ ರೀತಿಯ ಸಂಬಂಧವನ್ನು ಇಟ್ಟುಕೊಳ್ಳಬಾರದು. ಕ್ರಿಕೆಟ್​ ವಿಚಾರಕ್ಕೆ ಬಂದಾಗ ನಾವು ಯಾವುದೇ ರೀತಿಯ ಸಂಬಂಧ ಅವರೊಂದಿಗೆ ಹೊಂದಲು ಸಾಧ್ಯವಿಲ್ಲ ಎಂಬುವುದಾಗಿ ಬಜ್ಜಿ ಪ್ರತಿಕ್ರಿಯೆ ನೀಡಿದ್ದಾರೆ.