ಡಬ್ಲ್ಯೂಪಿಎಲ್: ಇಂದು ಆರ್‌ಸಿಬಿ v/s ಡೆಲ್ಲಿ ಕ್ಯಾಪಿಟಲ್ಸ್-ಅಭಿಮಾನಿಗಳಲ್ಲಿ ಕಾತರ

•   Sun, Mar 05 2023 10:44:37 AM



• ಮುಂಬಯಿ, ಮಾ 05 (DaijiworldNews/DB): ನಿನ್ನೆಯಿಂದ ವನಿತಾ ಪ್ರೀಮಿಯರ್ ಲೀಗ್ ಅಧಿಕೃತವಾಗಿ ಆರಂಭಗೊಂಡಿದ್ದು, ಕನ್ನಡಿಗರು ಕುತೂಹಲದಿಂದ ಕಾಯುತ್ತಿರುವ ಆರ್‌ಸಿಬಿ ಮಹಿಳಾ ತಂಡ ಇಂದು ಕಣಕ್ಕಿಳಿಯಲಿದೆ. ಸ್ಮೃತಿ ಮಂದನಾ ನೇತೃತ್ವದ ಆರ್‌ಸಿಬಿ ತಂಡವು ಚೊಚ್ಚಲ ಐಪಿಎಲ್‌‌ನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡವನ್ನು ಎದುರಿಸಲಿದೆ.

  ಭಾನುವಾರ ಮಧ್ಯಾಹ್ನ ಪಂದ್ಯ ನಡೆಯಲಿದೆ. ಮೆಗ್ ಲ್ಯಾನಿಂಗ್ ನೇತೃತ್ವದ ಡೆಲ್ಲಿ ಕ್ಯಾಪಿಟಲ್ಸ್ ಜೊತೆ ಮಂದಾನ ತಂಡ ಸೆಣಸಾಡಲಿದೆ. ಪುರುಷರ ಐಪಿಎಲ್‌ನಲ್ಲಿ ಈವರೆಗೆ ಆರ್‌ಸಿಬಿ ಚಾಂಪಿಯನ್‌ ಪಟ್ಟಕ್ಕೇರದಿರುವುದರಿಂದ ಇದೀಗ ಮಹಿಳಾ ಆರ್‌ಸಿಬಿ ತಂಡದ ಮೇಲೆ ಕ್ರಿಕೆಟ್ ಅಭಿಮಾನಿಗಳಿಗೆ ನಿರೀಕ್ಷೆ ಹೆಚ್ಚಾಗಿದೆ.

  ಕೂಟದ ಹರಾಜಿನಲ್ಲಿ ಅತ್ಯಧಿಕ ಬೆಲೆಗೆ ಮಾರಾಟಗೊಂಡ ಸ್ಮೃತಿ ಮಂದಾನ, ಎಲ್ಲಿಸ್‌ ಪೆರ್ರಿ, ಹೀತರ್‌ ನೈಟ್‌, ಸೋಫಿ ಡಿವೈನ್‌, ಮರಿಜಾನ್‌ ಕಾಪ್‌, ಮೆಗಾನ್‌ ಶಟ್‌, ರಿಚಾ ಘೋಷ್‌ ಮುಂತಾದವರು ಮಹಿಳಾ ಆರ್‌ಸಿಬಿ ತಂಡದಲ್ಲಿದ್ದಾರೆ. ಇನ್ನು ಡೆಲ್ಲಿ ಕ್ಯಾಪಿಟಲ್ಸ್‌ನಲ್ಲಿ ಜೆಸ್‌ ಜೊನಾಸೆನ್‌, ಮರಿಜಾನ್‌ ಕಾಪ್‌, ಅಲೈಸ್‌ ಕ್ಯಾಪ್ಸಿ ಮುಂತಾದ ವಿದೇಶೀ ಆಟಗಾರ್ತಿಯರಿದ್ದರೆ, ಭಾರತದ ಪ್ರತಿಭೆಗಳಾದ ಶಫಾಲಿ ವರ್ಮ, ಜೆಮಿಮಾ ರೋಡ್ರಿಗಸ್‌, ಶಿಖಾ ಪಾಂಡೆ, ಪೂನಂ ಯಾದವ್‌, ಅರುಂಧತಿ ರೆಡ್ಡಿ, ತನಿಯಾ ಭಾಟಿಯಾ, ರಾಧಾ ಯಾದವ್‌, ತಿತಾಸ್‌ ಸಾಧು, ಜಮ್ಮು ಮತ್ತು ಕಾಶ್ಮೀರದ ಬಿಗ್‌ ಹಿಟ್ಟರ್‌ ಜಾಸಿಯಾ ಅಖ್ತರ್‌ ಮುಂತಾದವರಿದ್ದಾರೆ. ಹೀಗಾಗಿ ಆರ್‌ಸಿಬಿ ಮತ್ತು ಡೆಲ್ಲಿ ಕ್ಯಾಪಿಟಲ್ಸ್ ನಡುವಿನ ರೋಚಕ ಪಂದ್ಯ ವೀಕ್ಷಿಸಲು ಕ್ರೀಡಾಭಿಮಾನಿಗಳು ಕಾದು ಕುಳಿತಿದ್ದಾರೆ. ಗೆಲುವು ಯಾರ ಪಾಲಾಗಲಿದೆ ಎಂಬ ನಿರೀಕ್ಷೆ ಅಭಿಮಾನಿಗಳದ್ದು.