ಬಹು ಕಾಲದ ಗೆಳತಿಯೊಂದಿಗೆ ದಾಂಪತ್ಯ ಜೀವನಕ್ಕೆ ಕಾಲಿಟ್ಟ ಶ್ರೀಲಂಕಾ ಕ್ರಿಕೆಟಿಗ ಹಸರಂಗ

•   Fri, Mar 10 2023 12:24:18 PM



• ಕೊಲೊಂಬೊ, ಮಾ 10 (DaijiworldNews/DB): ಶ್ರೀಲಂಕಾ ತಂಡದ ಕ್ರಿಕೆಟಿಗ ವಾನಿಂದು ಹಸರಂಗ ಅವರು ತಮ್ಮ ಬಹು ಕಾಲದ ಗೆಳತಿ ವಿಂದ್ಯಾ ಅವರೊಂದಿಗೆ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದಾರೆ.

  ಶ್ರೀಲಂಕಾದ ಸ್ಪಿನ್ ಮಾಂತ್ರಿಕ ಎಂದೇ ಖ್ಯಾತಿಯಾಗಿರುವ ಆರ್‌ಸಿಬಿ ತಂಡದ ಆಲ್‌ರೌಂಡರ್ ಹಸರಂಗ ಅವರು ಮಾರ್ಚ್ 9ರಂದು ವೈವಾಹಿಕ ಜೀವನಕ್ಕೆ ಕಾಲಿಟ್ಟಿದ್ದಾರೆ. ಕಳೆದ ಹಲವು ವರ್ಷಗಳಿಂದ ವಾನಿಂದು ಹಸರಂಗ ಮತ್ತು ವಿಂದ್ಯಾ ಪ್ರೀತಿಸುತ್ತಿದ್ದರು. ಆತ್ಮೀಯರು ಹಾಗೂ ಕುಟುಂಬಸ್ಥರ ಸಮ್ಮುಖದಲ್ಲಿ ವಿವಾಹ ನೆರವೇರಿದೆ.

  ಇನ್ನು ಹಸರಂಗ ಅವರ ವಿವಾಹದ ಫೋಟೋಗಳನ್ನು ಆರ್‌ಸಿಬಿ ಕೂಡಾ ತನ್ನ ಟ್ವಿಟರ್ ಖಾತೆಯಲ್ಲಿ ಶೇರ್ ಮಾಡಿ ನವ ದಂಪತಿಗಳಿಗೆ ಶುಭ ಹಾರೈಸಿದೆ. ಜೋಡಿಯ ಮದುವೆಯ ಫೋಟೋಗಳು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.

  ಶ್ರೀಲಂಕಾ ಕ್ರಿಕೆಟ್ ತಂಡದಲ್ಲಿ ಹಸರಂಗ ತನ್ನದೇ ಆದ ವಿಶಿಷ್ಟ ಕಲೆಯಿಂದ ಪ್ರಸಿದ್ದಿಯಾಗಿದ್ದರು. 2022ರ ಏಷ್ಯಾಕಪ್‌ನಲ್ಲಿ ಅವರ ಅದ್ಬುತ ಪ್ರದರ್ಶನವು ಪಾಕಿಸ್ತಾನದ ವಿರುದ್ದ ಶ್ರೀಲಂಕಾ ತಂಡ ಜಯ ಗಳಿಸಲು ಕಾರಣವಾಗಿತ್ತು. 2022ರ ಟಿ20 ವಿಶ್ವಕಪ್‌ನಲ್ಲಿ15 ವಿಕೆಟ್ ಪಡೆಯುವ ಮೂಲಕ ಅತಿಹೆಚ್ಚು ವಿಕೆಟ್ ಪಡೆದ ಹೆಗ್ಗಳಿಕೆಗೆ ಪಾತ್ರರಾಗಿದ್ದರು.