ರಾಹುಲ್ ಹೊಗಳಿದ ವೆಂಕಟೇಶ್ ಪ್ರಸಾದ್ ಸಖತ್ ಟ್ರೋಲ್‌-ಯಾಕೆ ಗೊತ್ತಾ?

•   Sat, Mar 18 2023 10:54:20 AM



• ಮುಂಬೈ, ಮಾ 18 (DaijiworldNews/DB): ಮುಂಬೈನ ವಾಂಖೆಡೆ ಸ್ಟೇಡಿಯಂನಲ್ಲಿ ಶುಕ್ರವಾರ ನಡೆದ ಆಸ್ಟ್ರೇಲಿಯಾ ವಿರುದ್ದದ ಮೊದಲ ಏಕದಿನ ಪಂದ್ಯದಲ್ಲಿ ಭಾರತ ತಂಡದ ಗೆಲುವಿಗೆ ಮುಖ್ಯ ಕಾರಣರಾದವರು ಕನ್ನಡಿಗ ಕೆ.ಎಲ್. ರಾಹುಲ್. ತಂಡದ ಪರ ಅದ್ಬುತ ಪ್ರದರ್ಶನ ನೀಡುವ ಮೂಲಕ ತಮ್ಮನ್ನು ಟೀಕಿಸಿದ್ದವರಿಗೆ ಬ್ಯಾಟ್ ಮೂಲಕವೇ ಉತ್ತರಿಸಿದರು.

  ಇನ್ನು ಕೆ.ಎಲ್. ರಾಹುಲ್‌ನನ್ನು ಹಲವು ಬಾರಿ ಟೀಕಿಸಿದ್ದ ಹಿರಿಯ ಕ್ರಿಕೆಟಿಗ ವೆಂಕಟೇಶ್ ಪ್ರಸಾದ್ ಅವರೂ, ರಾಹುಲ್‌ರ ನಿನ್ನೆಯ ಪ್ರದರ್ಶನವನ್ನು ಸರಣಿ ಟ್ವೀಟ್ ಮೂಲಕ ಹೊಗಳಿದ್ದು ವಿಶೇಷವಾಗಿತ್ತು. ಆದರೆ ಕೆ.ಎಲ್. ರಾಹುಲ್‌ರನ್ನು ಹಲವು ಬಾರಿ ತೆಗಳಿದ್ದ ವೆಂಕಟೇಶ್ ಪ್ರಸಾದ್ ಮೇಲೆ ಅಸಮಾಧಾನಗೊಂಡಿದ್ದ ರಾಹುಲ್ ಅಭಿಮಾನಿಗಳಂತೂ ವೆಂಕಟೇಶ್ ಪ್ರಸಾದ್‌ರ ಈ ಬಾರಿಯ ಹೊಗಳಿಕೆಗೆ ಹಿಗ್ಗಾಮುಗ್ಗ ತರಾಟೆಗೆ ತೆಗೆದುಕೊಂಡಿದ್ದಾರೆ.

  ರಾಹುಲ್‌ರ ಹಲವು ಅಭಿಮಾನಿಗಳು ವೆಂಕಟೇಶಪ್ರಸಾದ್‌ರನ್ನು ಗೋಸುಂಬೆ ಎಂದು ಜರೆದಿದ್ದಾರೆ. ಇನ್ನು ಕೆಲವರು ಹೊಸ ನಾಟಕ ಶುರು ಎಂದು ಟೀಕಿಸಿದ್ದಾರೆ. ಇನ್ನು ಹಲವರು ಸಿಕ್ಕಾಪಟ್ಟೆ ಮೀಮ್ಸ್ ಮಾಡಿದ್ದಾರೆ.

  ಟೆಸ್ಟ್ ಸರಣಿಯ ಮೊದಲೆರಡು ಪಂದ್ಯಗಳಲ್ಲಿ ವಿಫಲರಾಗಿದ್ದ ಕೆ.ಎಲ್. ರಾಹುಲ್‌ರನ್ನು ತಂಡದಿಂದ ಹೊರಗಿಡಲಾಗಿತ್ತು. ಟೆಸ್ಟ್ ಉಪ ನಾಯಕನ ಸ್ಥಾನವನ್ನೂ ರಾಹುಲ್ ಕಳೆದುಕೊಂಡಿದ್ದರಲ್ಲದೆ, ತಮ್ಮ ಕಳಪೆ ಪ್ರದರ್ಶನದಿಂದಾಗಿ ವ್ಯಾಪಕ ಟೀಕೆಗೆ ಗುರಿಯಾಗಿದ್ದರು. ಆದರೆ ಬಾರ್ಡರ್-ಗವಾಸ್ಕರ್ ಟ್ರೋಫಿ ವೇಳೆ ರಾಹುಲ್‌ ಟೀಕಿಸಿದ್ದವರೆಲ್ಲಾ ನಿನ್ನೆಯ ಪಂದ್ಯದಲ್ಲಿ ಅವರನ್ನು ಸಿಕ್ಕಾಪಟ್ಟೆ ಹೊಗಳಿದ್ದಾರೆ.

  Excellent composure under pressure and a brilliant innings by KL Rahul.
  Top knock. Great support by Ravindra Jadeja and a good win for India.#INDvAUS pic.twitter.com/tCs74rBiLP

  — Venkatesh Prasad (@venkateshprasad) March 17, 2023