ಆರ್‌ಸಿಬಿ ಇಂದಿನ ಪಂದ್ಯ ಗೆದ್ದರೆ ಪ್ಲೇ ಆಫ್ ಗೆ - ಇಲ್ಲದಿದ್ದರೆ ಕಪ್ ಗೆಲ್ಲುವ ಕನಸು ಭಗ್ನ

•   Sun, May 21 2023 03:52:40 PM



• ಬೆಂಗಳೂರು,ಮೇ21(DaijiworldNews/KH):ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡಕ್ಕೆ ಇಂದು ನಡೆಯುವ ಐಪಿಎಲ್ ಪಂದ್ಯಾಟ ಮಾಡು ಇಲ್ಲವೇ ಮಡಿಯಂತಾಗಿದೆ. ಇಂದು ಗೆಲುವು ದಾಖಲಿಸಿದರೆ ಮಾತ್ರ ಪ್ಲೇ ಆಫ್ ಪ್ರವೇಶಿಸಲು ಅವಕಾಶವಿದೆ, ಇಲ್ಲದಿದ್ದರೆ ಈ ಬಾರಿಯೂ ಕಪ್ ಗೆಲ್ಲುವ ಕನಸಿನಿಂದ ದೂರ ಹೋಗುತ್ತದೆ.

  ಆದರೆ ಈ ಪಂದ್ಯಕ್ಕೂ ಮೊದಲೇ ಬೆಂಗಳೂರು ಫ್ರಾಂಚೈಸಿಗೆ ಶಾಕ್ ಎದುರಾಗಿದ್ದು, ತಂಡದ ಪ್ರಮುಖ ಬೌಲರ್ ಜೋಶ್ ಹೇಜಲ್ ವುಡ್ ಅವರು ಮತ್ತೆ ಗಾಯಗೊಂಡಿದ್ದಾರೆ. ಆರಂಭದಲ್ಲೇ ಗಾಯಗೊಂಡಿದ್ದ ಹೇಜಲ್ ವುಡ್ ಆರ್‌ಸಿಬಿಯ ಆರಂಭಿಕ ಎಂಟು ಪಂದ್ಯಗಳಲ್ಲಿ ಆಡಿರಲಿಲ್ಲ. ನಂತರ ಮೂರು ಪಂದ್ಯಗಳಲ್ಲಿ ಆಸೀಸ್ ವೇಗಿ ಆಡಿದ್ದರು. ಆದರೆ ಅವರ ಗಾಯ ಮರುಕಳಿಸಿದ್ದು, ಕೂಟದಿಂದಲೇ ಹೊರಬಿದ್ದಿದ್ದಾರೆ.

  ಈಗಾಗಲೇ ಆರ್‌ಸಿಬಿಯ ಡೇವಿಡ್ ವಿಲ್ಲಿ ಮತ್ತು ರೀಸ್ ಟೋಪ್ಲಿ ಗಾಯದ ಕಾರಣದಿಂದ ತವರಿಗೆ ಮರಳಿದ್ದಾರೆ. ಜೋಶ್ ಹೇಜಲ್ ವುಡ್ ಮತ್ತೊಂದು ಸೇರ್ಪಡೆಯಾಗಿದ್ದಾರೆ. ಐಪಿಎಲ್ ನಿಂದ ಹೊರಬಿದ್ದ ಹೇಜಲ್ ವುಡ್ ತವರಿಗೆ ಮರಳಿದ್ದಾರೆ. ಜೂನ್ ನಲ್ಲಿ ನಡೆಯಲಿರುವ ವಿಶ್ವ ಟೆಸ್ಟ್ ಚಾಂಪಿಯನ್ ಶಿಪ್ ಫೈನಲ್ ನಲ್ಲಿಯೂ ಅವರು ಆಡುವುದು ಅನುಮಾನ ಎನ್ನಲಾಗಿದೆ.