ವಿಶ್ವಕಪ್ ನಲ್ಲಿ ಕೊಹ್ಲಿ ಬದಲು ರೋಹಿತ್ ಗೆ ನಾಯಕತ್ವ ನೀಡಿ-ಅಭಿಮಾನಿಗಳ ಆಗ್ರಹ

•   Sun, Apr 07 2019 10:12:54 PM



• ಮುಂಬೈ, ಏ 07(SM): ಈ ಬಾರಿಯ ಐಪಿಎಲ್​ನಲ್ಲಿ ಆಡಿರುವ 6 ಪಂದ್ಯಗಳಲ್ಲೂ ಸೋಲುಂಡಿರುವ ಆರ್​ಸಿಬಿ ತಂಡ ಟೂರ್ನಿಯಲ್ಲಿ ಕೊನೆಯ ಸ್ಥಾನದಲ್ಲಿದೆ. ಈ ಹಿನ್ನೆಲೆ ನಾಯಕ ಕೊಹ್ಲಿಯನ್ನು ವಿಶ್ವಕಪ್​ ತಂಡಕ್ಕೆ ನಾಯಕನನ್ನಾಗಿ ಮಾಡುವುದು ಬೇಡ ಎಂಬ ಮಾತುಗಳು ಸೋಷಿಯಲ್​ ಮೀಡಿಯಾಗಳಲ್ಲಿ ಕೇಳಿಬರುತ್ತಿವೆ.

  

  ಸತತ 6ನೇ ಸೋಲುಂಡಿರುವ ಆರ್​ಸಿಬಿ ಐಪಿಎಲ್​ನಲ್ಲಿ ಕೊನೆಯ ಸ್ಥಾನದಲ್ಲಿದೆ. ನಾಯಕತ್ವದಲ್ಲಿ ಪದೇಪದೆ ಕೊಹ್ಲಿ ವೈಫಲ್ಯ ಎದ್ದು ಕಾಣುತಿದೆ. ತಂಡದ ಆಯ್ಕೆ, ಫೀಲ್ಡಿಂಗ್​ ಸಂಯೋಜನೆಯಲ್ಲಿ ಕೊಹ್ಲಿ ಎಡವಟ್ಟು ಮಾಡುತ್ತಿದ್ದು, ಈ ಹಿನ್ನೆಲೆ ಕೊಹ್ಲಿಗೆ ಭಾರತ ತಂಡದ ನಾಯಕತ್ವ ನೀಡುವ ಬದಲು ಮುಂಬೈ ತಂಡದ ನಾಯಕನಾಗಿರುವ ರೋಹಿತ್​ ಶರ್ಮಾಗೆ ನೀಡಬೇಕು ಎಂದು ಟ್ವಿಟರ್​ನಲ್ಲಿ ಅಭಿಮಾನಿಗಳು ಬೇಡಿಕೆಯಿಡುತ್ತಿದ್ದಾರೆ.

  ಮುಂಬೈ ತಂಡ ಶನಿವಾರ ಹೈದರಾಬಾದ್​ನಂತಹ ಬಲಿಷ್ಠ ತಂಡಕ್ಕೆ 137 ರನ್​ಗಳ ಟಾರ್ಗೆಟ್​ ನೀಡಿ 40 ರನ್​ಗಳಿಂದ ಗೆಲುವು ಸಾಧಿಸಿತ್ತು. ಕಡಿಮೆ ರನ್​ ಟಾರ್ಗೆಟ್​ ನೀಡಿದರೂ ರೋಹಿತ್​ ಶರ್ಮಾ ತನ್ನ ನಾಯಕತ್ವವನ್ನು ಉತ್ತಮವಾಗಿ ನಿಭಾಯಿಸಿದ್ದಾರೆ. ತಮ್ಮ ಕ್ಷೇತ್ರ ರಕ್ಷಣೆ ಸಂಯೋಜನೆ, ಬೌಲರ್​ಗಳ ಆಯ್ಕೆಯಿಂದ ತಂಡಕ್ಕೆ ಗೆಲುವು ದೊರೆಕಿಸಿಕೊಟ್ಟಿದ್ದರು. ಆದರೆ, ಕೊಹ್ಲಿ ತಂಡ 200 ರನ್​ಗಳಿಸಿದರೂ ಪಂದ್ಯ ಗೆಲ್ಲಲು ವಿಫಲವಾಗುತ್ತಿದೆ. ನಿರಂತರ ಸೋಲುಗಳಿಂದ ಕೊಹ್ಲಿ ಮೇಲೆ ಒತ್ತಡ ಹೆಚ್ಚಾಗಿದೆ.

  ಇದು ಮುಂಬರುವ ವಿಶ್ವಕಪ್ ಪಂದ್ಯದಲ್ಲಿ ಭಾರತಕ್ಕೆ ನೇರವಾರ ಪರಿಣಾಮ ಬೀರಲಿದೆ ಎಂದು ಸಾಮಾಜಿಕ ಜಾಲ ತಾಣಗಳಲ್ಲಿ ಕೆಲವರು ಟ್ವಿಟ್ ಮಾಡುತ್ತಿದ್ದಾರೆ