ದೆಹಲಿ: 2019ರ ವಿಶ್ವಕಪ್ ಪಂದ್ಯದಲ್ಲಿ ಹೊಸಬರದೇ ಕಾರುಬಾರು

•   Wed, Apr 17 2019 09:44:16 PM



• ದೆಹಲಿ, ಏ 17 (Daijiworld News/SM): ಮುಂದಿನ ತಿಂಗಳು ನಡೆಯಲಿರುವ 2019ರ ವಿಶ್ವಕಪ್​ಗೆ 15 ಸದಸ್ಯರ ತಂಡ ಈಗಾಗಲೇ ಪ್ರಕಟಗೊಂಡಿದೆ. ಯುವ ಕ್ರೀಡಪಟುಗಳೇ ಈ ತಂಡದಲ್ಲಿದ್ದಾರೆ. ಇದರಲ್ಲಿ 7 ಆಟಗಾರರು ಚೊಚ್ಚಲ ವಿಶ್ವಕಪ್​ ಆಡುತ್ತಿದ್ದಾರೆ.

  

  ಕಳೆದ ಎರಡು ವರ್ಷಗಳಿಂದ ಸೀಮಿತ ಓವರ್​ಗಳಲ್ಲಿ ಅದ್ಭುತ ಪ್ರದರ್ಶನ ತೋರುತ್ತಿರುವ ಆಟಗಾರರಾದ ಬುಮ್ರಾ, ಕುಲ್ದೀಪ್​ ಯಾದವ್​, ಕೇದಾರ್​ ಜಾಧವ್​, ಯಜುವೇಂದ್ರ ಚಹಾಲ್​, ಹಾರ್ದಿಕ್​ ಪಾಂಡ್ಯ, ವಿಜಯ್​ ಶಂಕರ್​ ಹಾಗೂ ಕನ್ನಡಿಗ ಕೆಎಲ್​ ರಾಹುಲ್​ಗೆ ಈ ಬಾರಿಯ ವಿಶ್ವಕಪ್ ಚೊಚ್ಚಲವೆನಿಸಲಿದೆ.

  ಜಸ್ಪ್ರೀತ್​ ಬುಮ್ರಾ ಏಕದಿನ ಕ್ರಿಕೆಟ್​ ಬೌಲಿಂಗ್​ ಶ್ರೇಯಾಂಕದಲ್ಲಿ ಜಸ್ಪ್ರೀತ್​ ಬುಮ್ರಾ ಮೊದಲ ಸ್ಥಾನದಲ್ಲಿದ್ದು, ಕಳೆದೆರಡು ವರ್ಷಗಳಿಂದ ಸೀಮಿತ ಓವರ್​ಗಳ ಕ್ರಿಕೆಟ್​ನಲ್ಲಿ ಟೀಂ ಇಂಡಿಯಾಕ್ಕೆ ಆಧಾರವೆನಿಸಿದ್ದಾರೆ. 49 ಏಕದಿನ ಪಂದ್ಯಗಳಲ್ಲಿ ಆಡಿರುವ ಬುಮ್ರಾ 85 ವಿಕೆಟ್​ ಪಡೆದಿದ್ದಾರೆ.

  ಇನ್ನು ಕನ್ನಡಿಗ ಕೆಎಲ್​ ರಾಹುಲ್ ​ಕೇವಲ 14 ಏಕದಿನ ಪಂದ್ಯಗಳಲ್ಲಿ ಭಾರತ ತಂಡವನ್ನು ಪ್ರತಿನಿಧಿಸಿದ್ದಾರೆ. ಕನ್ನಡಿಗ ರಾಹುಲ್ ಗೂ ಇದು ಚೊಚ್ಚಲ ವಿಶ್ವಪಕ್. ರಾಹುಲ್​ 13 ಇನ್ನಿಂಗ್ಸ್‌​ನಲ್ಲಿ ಒಂದು ಶತಕ ಹಾಗೂ 2 ಅರ್ಧಶತಕ ಸಿಡಿಸಿದ್ದಾರೆ.
  ಇನ್ನು ತಮಿಳುನಾಡು ಮೂಲದ ವಿಜಯ್​ ಶಂಕರ್​ ಇದೇ ವರ್ಷ ಆಸ್ಟ್ರೇಲಿಯಾ ವಿರುದ್ಧದ ಏಕದಿನ ಕ್ರಿಕೆಟ್​ ಟೂರ್ನಿಯಲ್ಲಿ ಆಡುವ ಅವಕಾಶ ಪಡೆದು ಅಂತಾರಾಷ್ಟ್ರೀಯ ಏಕದಿನ ಪಂದ್ಯಕ್ಕೆ ಎಂಟ್ರಿಕೊಟ್ಟಿದ್ದರು. ಅವರು ಕೇವಲ 9 ಪಂದ್ಯಗಳಲ್ಲಿ ಭಾರತ ತಂಡವನ್ನು ಪ್ರತಿಸಿಧಿಸಿದ್ದಾರೆ. ಇವರು ಆಲ್​ರೌಂಡರ್​ ಕೋಟಾದಲ್ಲಿ ವಿಶ್ವಕಪ್​ ಟಿಕೆಟ್​ ಗಿಟ್ಟಿಸಿಕೊಂಡಿದ್ದಾರೆ.

  
  ಕುಲ್ದೀಪ್​ ಯಾದವ್​ ಭಾರತದ ಮಂಚೂಣಿ ಸ್ಪಿನ್​ ಬೌಲರ್​ ಆಗಿದ್ದಾರೆ. ಯಾದವ್ 44 ಪಂದ್ಯಗಳಲ್ಲಿ ಭಾರತವನ್ನು ಪ್ರತಿನಿಧಿಸಿದ್ದು, 87 ವಿಕೆಟ್​ ಪಡೆದಿದ್ದಾರೆ. ​ಯಾದವ್​ 2017 ರಲ್ಲಿ ಏಕದಿನ ಕ್ರಿಕೆಟ್​ಗೆ ಪದಾರ್ಪಣೆ ಮಾಡಿದ್ದರು.

  ಹಾರ್ದಿಕ್​ ಪಾಂಡ್ಯ ಆಲ್​ರೌಂಡರ್​ ಕೋಟಾದಲ್ಲಿ ಖಾಯಂ ಎನಿಸಿಕೊಂಡಿದ್ದಾರೆ. ಭಾರತ ತಂಡದ ಸದಸ್ಯನಾಗಿರುವ ಹಾರ್ದಿಕ್​ ಪಾಂಡ್ಯ 2016 ರಲ್ಲಿ ಏಕದಿನ ಕ್ರಿಕೆಟ್​ಗೆ ಎಂಟ್ರಿಕೊಟ್ಟಿದ್ದರು. ಪಾಂಡ್ಯ 45 ಪಂದ್ಯಗಳಲ್ಲಿ ಭಾರತ ತಂಡವನ್ನು ಪ್ರತಿನಿಧಿಸಿದ್ದು, 4 ಅರ್ಧಶತಕ ಸಹಿತ 731 ರನ್​ ಸಿಡಿಸಿದ್ದಾರೆ. ಬೌಲಿಂಗ್​ನಲ್ಲಿ 44 ವಿಕೆಟ್​ ಗಳನ್ನು ಪಡೆದುಕೊಂಡಿದ್ದಾರೆ.

  ಇನ್ನು ಯಜುವೇಂದ್ರ ಚಹಾಲ್​ 2016 ರಲ್ಲಿ ಏಕದಿನ ಕ್ರಿಕೆಟ್​ಗೆ ಪದಾರ್ಪಣೆ ಮಾಡಿದ್ದರು. ಚಹಾಲ್​ ತಮ್ಮ ಸ್ಪಿನ್​ ಕೈಚಳಕದಿಂದ 41 ಪಂದ್ಯಗಳಿಂದ 72 ವಿಕೆಟ್​ ಪಡೆದಿದ್ದಾರೆ. ಇವರಿಗೂ ಕೂಡ ಇದುವೇ ಮೊದಲ ವಿಶ್ವಕಪ್ ಪಂದ್ಯವಾಗಲಿದೆ.

  ಕೇದಾರ್​ ಜಾಧವ್​ 2014ರಲ್ಲಿ ಏಕದಿನ ಕ್ರಿಕೆಟ್​ಗೆ ಪದಾರ್ಪಣೆ ಮಾಡಿದ್ದಾರೆ. ಇವರು 59 ಪಂದ್ಯಗಳಲ್ಲಿ ಭಾರತ ತಂಡವನ್ನು ಪ್ರತಿನಿಧಿಸಿದ್ದು 102 ಸ್ಟ್ರೈಕ್​ರೇಟ್​ನಲ್ಲಿ 1174 ರನ್​ ಗಳಿಸಿದ್ದಾರೆ. ಇದರಲ್ಲಿ 2 ಶತಕ ಹಾಗೂ 5 ಅರ್ಧಶತಕ ಕೂಡ ಸೇರಿವೆ.

  ಈ ಏಳು ಮಂದಿಯನ್ನು ಹೊರತುಪಡಿಸಿ ಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿ ತಮ್ಮ 4ನೇ ವಿಶ್ವಕಪ್​ ಆಡುತ್ತಿದ್ದರೆ, ರೋಹಿತ್​, ಕೊಹ್ಲಿ ಪಾಲಿಗಿದು 3ನೇ ವಿಶ್ವಕಪ್​ ಆಗಿದೆ. ಕಾರ್ತಿಕ್ ​2007ರ ವಿಶ್ವಕಪ್​ನಲ್ಲಿ ಸ್ಥಾನ ಪಡೆದಿದ್ದರು. ಇದೀಗ 10 ವರ್ಷಗಳ ನಂತರ ಮತ್ತೆ ವಿಶ್ವಕಪ್​ ಟೀಮ್​ನಲ್ಲಿ ಕಾಣಿಸಿಕೊಂಡಿದ್ದಾರೆ. ಭುವನೇಶ್ವರ್​, ಮೊಹಮ್ಮದ್​ ಶಮಿ, ರವೀಂದ್ರ ಜಡೇಜಾ ಹಾಗೂ ಶಿಖರ್​ ಧವನ್​ 2015ರ ವಿಶ್ವಕಪ್​ನಲ್ಲಿ ಆಡಿದ್ದರು.