ಅಭಿಮಾನಿಯೊಂದಿಗೆ ಜಗಳಕ್ಕಿಳಿದ ಪಾಕ್ ಬ್ಯಾಟರ್; ವಿಡಿಯೋ ವೈರಲ್

•   Fri, Jun 07 2024 04:09:09 PM



• ಡಲ್ಲಾಸ್, ಜೂ. 07(DaijiworldNews/AA): ಅಭಿಮಾನಿಯೊಂದಿಗೆ ಪಾಕಿಸ್ತಾನ ತಂಡದ ವಿಕೆಟ್ ಕೀಪರ್ ಬ್ಯಾಟ್ಸ್‌ಮನ್ ಆಝಂ ಖಾನ್ ಬಹಿರಂಗವಾಗಿಯೇ ಜಗಳಕ್ಕಿಳಿದ ಘಟನೆ ಅಮೇರಿಕಾ ಹಾಗೂ ಪಾಕ್ ನಡುವೆ ನಡೆದ ಕ್ರಿಕೆಟ್ ಪಂದ್ಯಾಟದ ವೇಳೆ ನಡೆದಿದ್ದು, ಇದೀಗ ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.

  ಆತಿಥೇಯ ಅಮೆರಿಕ ವಿರುದ್ಧ ಪಾಕಿಸ್ತಾನವು ಸೂಪರ್ ಓವರ್‌ನಲ್ಲಿ ಸೋತಿದೆ. ಗೆಲ್ಲುವ ಪಂದ್ಯವನ್ನು ತಾವಾಗಿಯೇ ಕಳೆದುಕೊಂಡ ಪಾಕ್ ಆಟಗಾರರ ವಿರುದ್ಧ ಅಭಿಮಾನಿಗಳು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಪಂದ್ಯ ವೀಕ್ಷಣೆಗೆಂದು ತೆರಳಿದ್ದ ಪಾಕ್ ಅಭಿಮಾನಿಗಳು ಕ್ರೀಡಾಂಗಣದಲ್ಲೇ ಭಾರೀ ವಿರೋಧ ವ್ಯಕ್ತಪಡಿಸಿದ್ದಾರೆ.

  ಇದಕ್ಕೆ ಪೂರಕ ಎಂಬಂತೆ ಅಮೆರಿಕ ವಿರುದ್ಧ ತಾನು ಎದುರಿಸಿದ ಮೊದಲ ಎಸೆತದಲ್ಲೇ ಶೂನ್ಯಕ್ಕೆ ಔಟಾದ ಪಾಕ್ ತಂಡದ ಬ್ಯಾಟ್ಸ್‌ಮನ್ ಆಝಂ ಖಾನ್ ವಿರುದ್ಧ ಅಭಿಮಾನಿಯೊಬ್ಬರು ಕ್ರೀಡಾಂಗಣದಲ್ಲಿ ಅಸಮಾಧಾನ ಹೊರಹಾಕಿದ್ದು, ಆ ಅಭಿಮಾನಿಯೊಂದಿಗೆ ಆಝಂ ಖಾನ್ ಜಗಳಕ್ಕಿಳಿದಿದ್ದಾರೆ.

  ಆಝಂ ಖಾನ್, ಔಟಾದ ಹತಾಶೆಯಲ್ಲಿ ಡ್ರೆಸ್ಸಿಂಗ್ ರೂಂಗೆ ವಾಪಾಸ್ಸಾಗುತ್ತಿದ್ದ ವೇಳೆ ಪಾಕಿಸ್ತಾನಿ ಅಭಿಮಾನಿಯೊಬ್ಬ ಅವರಿಗೆ ಏನನ್ನೋ ಹೇಳಿದ್ದಾರೆ. ಇದರಿಂದ ಕೋಪಗೊಂಡ ಆಝಂ ಖಾನ್, ತಕ್ಷಣವೇ ಹಿಂದಿರುಗಿ ಆ ಅಭಿಮಾನಿಗೆ ಏನನ್ನೋ ಹೇಳಿದ್ದಾರೆ. ಈ ಇಬ್ಬರು ಪರಸ್ಪರ ವಾಕ್ಸಮರ ನಡೆಸಿದರು. ಪಂದ್ಯ ವೀಕ್ಷಿಸಲು ಬಂದಿದ್ದವರು ಇಬ್ಬರು ಜಗಳವಾಡಿಕೊಂಡಿದ್ದಾರೆ ಎಂದು ಸಾಮಾಜಿಕ ಜಾಲತಾಣದಲ್ಲಿ ತಿಳಿಸಿದ್ದಾರೆ.