ಕೊರೋನಾ ವೈರಸ್‌‌ ಬಗ್ಗೆ ಮೊದಲ ಬಾರಿ ಎಚ್ಚರಿಕೆ ನೀಡಿದ್ದ ಚೀನಿ ವೈದ್ಯ ಸೋಂಕಿಗೆ ಬಲಿ

•   Fri, Feb 07 2020 11:58:14 AM



• ಬಿಜೀಂಗ್, ಫೆ.07 (Daijiworld News/PY) : ಕೊರೋನಾ ವೈರಸ್‌‌ ಬಗ್ಗೆ ಮೊದಲ ಬಾರಿ ಎಚ್ಚರಿಕೆ ನೀಡಿದ್ದ ಚೀನಿ ವೈದ್ಯರೊಬ್ಬರು ಚಿಕಿತ್ಸೆ ಫಲಕಾರಿಯಾಗದೇ ಆತ ಕೆಲಸ ಮಾಡುತ್ತಿದ್ದ ಆಸ್ಪತ್ರೆಯಲ್ಲಿ ಶುಕ್ರವಾರ ಮೃತಪಟ್ಟಿದ್ದಾರೆ.

  

  ಲಿ ವೆನ್ಲಿಂಗ್ (34) ಸಾವನ್ನಪಿದ ವೈದ್ಯ. ಲಿ ವೆನ್ಲಿಂಗ್ ಅವರು ವುಹಾನ್​ನಲ್ಲಿ ಕಣ್ಣಿನ ವೈದ್ಯರಾಗಿ ಕಾರ್ಯ ನಿರ್ವಹಿಸುತ್ತಿದ್ದರು. ಇವರ ಆಸ್ಪತ್ರೆಗೆ ಬಂದ ಕೆಲವು ರೋಗಿಗಳಲ್ಲಿ 2002-03ರಲ್ಲಿ ಕಂಡು ಬಂದಿದ್ದ ಸಾರ್ಸ್​ ರೋಗದ ರೀತಿಯ ಲಕ್ಷಣಗಳು ಇದ್ದವು ಎಂಬ ವಿಚಾರದ ಬಗ್ಗೆ ಇವರು ಮೊದಲ ಬಾರಿಗೆ ಪತ್ತೆ ಹಚ್ಚಿದ್ದರು.

  ಡಿ.30ರಂದು ಲಿ ವೆನ್ಲಿಂಗ್ ಅವರು ಈ ವಿಚಾರವಾಗಿ ಸಹೋದ್ಯೋಗಿಗಳಿಗೆ ಸಂದೇಶ ರವಾನಿಸಿದ್ದು, ಸಾರ್ಸ್‌‌ ರೋಗದ ಮಾದರಿಯ ಸೋಂಕು ಪತ್ತೆಯಾಗಿದೆ, ಇದರ ಬಗ್ಗೆ ಜನರು ಜಾಗೃತೆ ವಹಿಸಿ, ಮಾಸ್ಕ್‌ ಧರಿಸಿ ಓಡಾಡುವಂತೆ ಹೇಳಿದ್ದರು. ಆದರೆ ಈ ವಿಚಾರವನ್ನು ನಂಬದ ಜನರು ಈತ ಸುಳ್ಳು ಹೇಳುತ್ತಿದ್ದಾನೆ ಎಂದು ವೈದ್ಯ ಸೇರಿದಂತೆ 8 ಜನರ ವಿರುದ್ದ ಪೊಲೀಸರು ಸಮನ್ಸ್‌‌‌‌ ಜಾರಿ ಮಾಡಿದ್ದರು.

  ರೋಗಿಗಳಿಗೆ ಚಿಕಿತ್ಸೆ ನೀಡುತ್ತಿದ್ದ ಲಿ ವೆನ್ಲಿಂಗ್ ಅವರು ಕೂಡಾ ಸೋಂಕಿಗೆ ತುತ್ತಾಗಿದ್ದು, ಹುಬೈ ಪ್ರಾಂತ್ಯದ ವುಹಾನ್​ ಸೆಂಟ್ರಲ್​ ಆಸ್ಪತ್ರೆಯಲ್ಲಿ ವೈದ್ಯ ಲಿ ವೆನ್ಲಿಂಗ್ ಅವರು ಸಾವನ್ನಪ್ಪಿದ್ದಾರೆ ಎಂದು ಚೀನಾದ ಸಾಮಾಜಿಕ ಜಾಲತಾಣದಲ್ಲಿ ಸುದ್ದಿಯಾಗಿದೆ.

  ಈ ವಿಚಾರವಾಗಿ ಹೇಳಿಕೆ ನೀಡಿರುವ ಆಸ್ಪತ್ರೆಯ ಅಧಿಕಾರಿಗಳು, ನಮ್ಮ ಆಸ್ಪತ್ರೆಯಲ್ಲಿ ಕಣ್ಣಿನ ವೈದ್ಯರಾಗಿ ಕಾರ್ಯ ನಿರ್ವಹಿಸುತ್ತಿದ್ದ ಲಿ ವೆನ್ಲಿಂಗ್ ಅವರು ಕೊರೋನಾ ವೈರಸ್‌‌ ತುತ್ತಾಗಿದ್ದು, ಚಿಕಿತ್ಸೆ ಫಲಕಾರಿಯಾಗದೇ ಅವರು ಫೆ.7ರ ಮಧ್ಯ ರಾತ್ರಿ 2.58ಕ್ಕೆ ಮೃತಪಟ್ಟಿದ್ದಾರೆ ಎಂದು ತಿಳಿಸಿದ್ದಾರೆ.