'ಕ್ಯಾಂಟಿನ್ ಹೆಸರಿಡುವಾಗ ಇಂದಿರಮ್ಮ ಬಿಟ್ಟು ಕನ್ನಡಿಗರ ನೆನಪಾಗಿಲ್ವಾ'? - ಸಂಸದ ಪ್ರತಾಪ್​​ ಸಿಂಹ

•   Thu, May 28 2020 12:44:58 PM



• ಬೆಂಗಳೂರು, ಮೇ 28 (Daijiworld News/MSP): ಕಾಂಗ್ರೆಸ್ ಪಕ್ಷಕ್ಕೆ ನೆಹರು ಕುಟುಂಬವನ್ನು ಹೊಗಳುತ್ತಲೇ ಇರುವುದು ಒಂದು ಖಯಾಲಿಯಾಗಿದೆ. ಹೀಗಾಗಿಯೇ ರಸ್ತೆ ,ಉದ್ಯಾನವನ ಎಲ್ಲದಕ್ಕೂ ಅವರದೇ ಹೆಸರು. ಆಗೆಲ್ಲಾ ಇವರಿಗೆ ಕನ್ನಡಿಗರ ನೆನಪುಗಳು ಆಗೋದೆ ಇಲ್ಲಾ. ನಾವು ಬೆಂಗಳೂರಿನ ಒಂದು ಮೇಲ್ಸೇತುವೆಗೆ ಸಾವರ್ಕರ್​​ ಹೆಸರಿಟ್ಟರೆ ಮಾತ್ರ ಕಾಂಗ್ರೆಸ್ ಗೆ ತಡೆದುಕೊಳ್ಳಲಾಗುವುದಿಲ್ಲ, ಎಂದು ಬಿಜೆಪಿ ಸಂಸದ ಪ್ರತಾಪ್​​ ಸಿಂಹ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

  

  ರಾಜ್ಯದಲ್ಲಿ ಕ್ಯಾಂಟೀನ್​​ ಸ್ಥಾಪನೆ ಮಾಡುವಾಗ ಇಂದಿರಾ ಗಾಂಧಿ ಹೆಸರಿಡುವ ಮೊದಲು ಕನ್ನಡಿಗರ ಹೆಸರು ಕಾಣಲಿಲ್ಲವೇ? ದೇಶದ ಬಹುತೇಕ ಕಡೆ ಕಾಂಗ್ರೆಸ್ ಪಕ್ಷ ಬೀದಿ, ಪಾರ್ಕ್​​ಗಳಿಗೆ ರಾಜೀವ್​​ ಗಾಂಧಿ, ಜವಹರಲಾಲ್ ನೆಹರು ಮತ್ತು ಇಂದಿರಾ ಗಾಂಧಿ ಎಂದೇ ಹೆಸರಿಡುವ ಸಂಪ್ರದಾಯ ಮುಂದುವರಿಸಿಕೊಂಡು ಬಂದಿದೆ. ಆದ್ರೆ ಇದೀಗ ರಾಜ್ಯ ಸರ್ಕಾರ ಯಲಹಂಕದ 'ಮೇಜರ್‌ ಸಂದೀಪ್‌ ಉನ್ನಿಕೃಷ್ಣನ್'‌ ರಸ್ತೆಯ ಪ್ಲೈ ಓವರ್ ಗೆ 'ವಿನಾಯಕ ದಾಮೋದರ ಸಾವರ್ಕರ್​​ ’ ಎಂದು ನಾಮಕರಣ ಮಾಡಿದರೆ ಮಾತ್ರ ಯಾಕೇ ಸಂಕಟ?" ಎಂದು ಕುಹಕವಾಡಿದ್ದಾರೆ.

  ನೆಹರು, ಇಂದಿರಾ ಗಾಂಧಿ, ರಾಜೀವ್​​ ಗಾಂಧಿ ಅವರ ಹೆಸರು ಜಪಿಸೋದು ಮಾತ್ರ ಕಾಂಗ್ರೆಸ್ ಗೊತ್ತು. ಸರ್ದಾರ್ ವಲ್ಲಭಭಾಯ್​​ ಪಟೇಲ್, ಅಂಬೇಡ್ಕರ್​ ಅವರನ್ನೇ ಕಾಂಗ್ರೆಸ್ ಸಹಿಸಲಿಲ್ಲ. ಈಗ ವೀರ್​ ಸಾವರ್ಕರ್​ ಹೆಸರು ಸಹಿಸುಕೊಳ್ಳುತ್ತಾರಾ? ಕ್ಯಾಂಟಿನ್ ಹೆಸರಿಡುವಾಗಲು ಇಂದಿರಮ್ಮ ಹೆಸರು ಮಾತ್ರ ಸಿದ್ದರಾಮಯ್ಯ ಕಾಣಿಸಿದೆ ಎಂದು ಪ್ರತಾಪ್​​ ಸಿಂಹ ವ್ಯಂಗ್ಯವಾಡಿದ್ದಾರೆ.

  ಕಾಂಗ್ರೆಸ್ ಪಕ್ಷವನ್ನು ಜನರು ತಿರಸ್ಕರಿಸಿದ್ದಾರೆ. ಇನ್ನಾದರೂ ಆತ್ಮಾವಲೋಕನ ಮಾಡಿಕೊಂಡರೆ ನಿಮಗೆ ಉಳಿಗಾಲವಿದೆ. ಇಲ್ಲದಿದ್ದರೆ ನಿರ್ಣಾಮ ಆಗಿಬಿಡುತ್ತೀರಾ ಎಂದು ಸಿದ್ದರಾಮಯ್ಯ ಅವರಿಗೆ ಸಂಸದ ಪ್ರತಾಪ್ ಸಿಂಹ ಸಲಹೆ ನೀಡಿದರು.