ರಿಷಿ ಕಪೂರ್​ಗೆ ಕ್ಯಾನ್ಸರ್...! - ಎಲ್ಲವೂ ಬರೀ ಸುಳ್ಳು ಎಂದ ಸೋದರ ರಣಧೀರ್​ ಕಪೂರ್​

•   Fri, Oct 05 2018 11:05:31 AM



• ನವದೆಹಲಿ, ಅ05(SS): ಕೆಲ ದಿನಗಳ ಹಿಂದೆಯಷ್ಟೇ ತಾಯಿಯ ಅಂತ್ಯಸಂಸ್ಕಾರಕ್ಕೆ ಆಗಮಿಸದೆ ಯುಎಸ್​ಗೆ ತೆರಳಿದ್ದ ರಿಷಿ ಕಪೂರ್​ ಅವರಿಗೆ ಕ್ಯಾನ್ಸರ್​ ಇದೆ. ಹಾಗಾಗಿ ಚಿಕಿತ್ಸೆಗಾಗಿ ಹೋಗಿದ್ದಾರೆ ಎಂದು ಎಲ್ಲೆಡೆ ಹರಡಿದ್ದ ಗಾಳಿ ಸುದ್ದಿಗೆ ಅವರ ಸೋದರ ರಣಧೀರ್​ ಕಪೂರ್​ ತೆರೆ ಎಳೆದಿದ್ದಾರೆ.

  

  ರಿಷಿ ಕಪೂರ್​ಗೆ ಕ್ಯಾನ್ಸರ್​ ಇದೆ ಎನ್ನುವುದು ರೂಮರ್​. ಅವರ ಆರೋಗ್ಯದಲ್ಲಿ ಏರುಪೇರಾಗಿದೆ. ನಾಳೆ ಯುಎಸ್​ನಲ್ಲಿ ವೈದ್ಯಕೀಯ ಪರೀಕ್ಷೆ ನಡೆಯಲಿದೆ. ರಿಷಿ ತಮ್ಮ ಆರೋಗ್ಯದ ಬಗ್ಗೆ ನಮ್ಮೊಂದಿಗೆ ಚರ್ಚಿಸಿದ್ದಾರೆ ಎಂದು ರಣಧೀರ್​ ಕಪೂರ್ ತಿಳಿಸಿದ್ದಾರೆ.

  ರಿಷಿ ಕಪೂರ್​ ತಾಯಿ ಅ.1ರಂದು ಹೃದಯಾಘಾತದಿಂದ ಮೃತಪಟ್ಟಿದ್ದರು. ಆದರೆ ಅವರ ಸಾವಿಗೂ ಎರಡು ದಿನದ ಮೊದಲು ಸೆ.29ರಂದು ರಿಷಿ ತಮ್ಮ ಪತ್ನಿ ನೀತು ಹಾಗೂ ಮಗ ರಣಬೀರ್​ ಜತೆ ಯುಎಸ್​ಗೆ ತೆರಳಿದ್ದರು. ಈ ಬಗ್ಗೆ ಟ್ವೀಟ್​ ಮಾಡಿದ್ದ ರಿಷಿ, ನಾನು ನಮ್ಮ ಕೆಲಸಗಳಿಂದ ಸ್ವಲ್ಪ ದಿನ ಬಿಡುವು ತೆಗೆದುಕೊಳ್ಳುತ್ತಿದ್ದೇನೆ. ಆರೋಗ್ಯದಲ್ಲಿ ಸಮಸ್ಯೆಯುಂಟಾಗಿದ್ದು ಚಿಕಿತ್ಸೆಗಾಗಿ ಅಮೆರಿಕಾಗೆ ಹೋಗುತ್ತಿದ್ದೇನೆ. 45 ವರ್ಷಗಳ ಕಾಲ ಸಿನಿಮಾ ಕ್ಷೇತ್ರದ ಏಳುಬೀಳುಗಳು ನನ್ನ ಜತೆಯಿವೆ. ಅಭಿಮಾನಿಗಳು ನನ್ನ ಆರೋಗ್ಯದ ಬಗೆಗಿನ ಅನಗತ್ಯ ರೂಮರ್​ಗಳಿಂದ ದುಃಖಿತರಾಗಬೇಡಿ. ನಿಮ್ಮ ಹಾರೈಕೆ, ಪ್ರೀತಿಯಿಂದ ಬಹುಬೇಗ ವಾಪಸ್​ ಬರುತ್ತೇನೆ ಎಂದಿದ್ದರು.

  ಬಳಿಕ ತಾಯಿಯ ಅಂತ್ಯಸಂಸ್ಕಾರಕ್ಕೆ ರಿಷಿ, ನೀತು, ರಣಬೀರ್​ ಗೈರಾಗಿದ್ದರು. ಈ ಬೆನ್ನಲ್ಲೇ ರಿಷಿ ಕಪೂರ್​ಗೆ ಕ್ಯಾನ್ಸರ್​ ಇದೆ ಎಂಬ ವದಂತಿ ಹರಡಿತ್ತು. ಮಾತ್ರವಲ್ಲ, ಎಲ್ಲೆಡೆ ಈ ಸುದ್ದಿ ಭಾರೀ ಚರ್ಚೆಗೆ ಕಾರಣವಾಗಿತ್ತು.