ಗುವಾಹಟಿ: ಕೊಹ್ಲಿ, ರೋಹಿತ್ ಸೂಪರ್ ಸೆಂಚುರಿ, ಮೊದಲ ಪಂದ್ಯದಲ್ಲಿ ವಿಂಡೀಸ್ ಮಣಿಸಿದ ಇಂಡಿಯಾ

•   Sun, Oct 21 2018 11:27:56 PM



• ಗುವಾಹಟಿ, ಅ 21(SM): ಭಾರತ ಹಾಗೂ ವೆಸ್ಟ್ ಇಂಡೀಸ್​ ನಡುವಿನ ಮೊದಲ ಏಕದಿನ ಪಂದ್ಯದಲ್ಲಿ ಕೊಹ್ಲಿ ಪಡೆ ಎಂಟು ವಿಕೆಟ್​ಗಳ ಜಯ ಸಾಧಿಸಿದೆ. ಆ ಮೂಲಕ ಐದು ಪಂದ್ಯಗಳ ಸರಣಿಯಲ್ಲಿ 1-0 ಮುನ್ನಡೆ ಸಾಧಿಸಿದೆ.

  

  
  323 ರನ್​ಗಳ ಬೃಹತ್ ಮೊತ್ತದ ಗುರಿ ಪಡೆದು ಬ್ಯಾಟಿಂಗ್​ಗೆ ಇಳಿದ ಟೀಮ್ ಇಂಡಿಯಾ, ಓಪನರ್​ ಶಿಖರ್​ ಧವನ್​ ವಿಕೆಟ್ ನ್ನು ಅತ್ಯಂತ ವೇಗವಾಗಿ ಒಪ್ಪಿಸಿತು. ಕೇವಲ ೪ ರನ್ನಿಗೆ ಧವನ್ ಫೆವಿಲಿಯನ್ ನತ್ತ ಹೆಜ್ಜೆ ಹಾಕಿದರು. ನಂತರ ರೋಹಿತ್ ಶರ್ಮಾ ಜೊತೆಯಾದ ನಾಯಕ ಕೊಹ್ಲಿ ಭರ್ಜರಿ ಇನ್ನಿಂಗ್ಸ್ ಕಟ್ಟಿದರು.

  ವಿರಾಟ್ ಕೊಹ್ಲಿ ಹಾಗೂ ರೋಹಿತ್​ ಶರ್ಮಾ ಎರಡನೇ ವಿಕೆಟ್​ಗೆ ತಂಡಕ್ಕೆ 246 ರನ್​ ಗಳ ಜತೆಯಾಟವಾಡಿದರು. ಈ ನಡುವೆ ಕೊಹ್ಲಿ ಶತಕ ಸಿಡಿಸಿದರೆ ಅತ್ತ ರೋಹಿತ್ ಶರ್ಮಾ ಸಹ ನಾಯಕನಿಗೆ ಸೆಂಚುರಿಯಲ್ಲಿ ಸಾಥ್ ನೀಡಿದರು.

  ವಿರಾಟ್ ಕೊಹ್ಲಿ 107 ಎಸೆತಗಳನ್ನು ಎದುರಿಸಿ 21 ಬೌಂಡರಿ ಹಾಗೂ ಎರಡು ಸಿಕ್ಸರ್ ಸಹಿತ 140 ರನ್ ಗಳಿಸಿದರು. ರೋಹಿತ್ ಶರ್ಮಾ 117 ಎಸೆತದಲ್ಲಿ ಎದುರಿಸಿ ಭರ್ಜರಿ ಎಂಟು ಸಿಕ್ಸರ್​ ಹಾಗೂ 16 ಬೌಂಡರಿ ಸಹಿತ 152 ರನ್​ ಬಾರಿಸಿ ತಂಡವನ್ನು ಜಯದತ್ತ ಕೊಂಡೊಯ್ದರು.

  ಇದಕ್ಕೂ ಮುನ್ನ ಟಾಸ್​ ಸೋತು ಬ್ಯಾಟಿಂಗ್​ಗೆ ಇಳಿದಿದ್ದ ವಿಂಡೀಸ್​ ತಂಡಕ್ಕೆ ಉತ್ತಮ ಆರಂಭ ದೊರೆಯಲಿಲ್ಲ. ಆರಂಭಿಕ ಚಂದ್ರಪಾಲ್ ಹೇಮರಾಜ್ 9 ರನ್ನಿಗೆ ಪೆವಿಲಿಯನ್ ಸೇರಿದರು. ಕೀರನ್ ಪೊವೆಲ್ 51 ರನ್ ಗಳಿಸಲಷ್ಟೇ ಶಕ್ತರಾದರು.

  ಮಧ್ಯಮ ಕ್ರಮಾಂಕದಲ್ಲಿ ತಂಡಕ್ಕೆ ಆಸರೆಯಾದ ಶಿಮ್ರೋನ್​ ಹೇಟ್​ಮೇರ್​​ ಆಕರ್ಷಕ ಶತಕ ಸಿಡಿಸಿ ತಂಡದ ಮೊತ್ತ ಹೊಚ್ಚಿಸಲು ನೆರವಾದರು. 78 ಎಸೆತದಲ್ಲಿ ಆರು ಸಿಕ್ಸರ್​ ಹಾಗೂ ಆರು ಬೌಂಡರಿ ಮೂಲಕ 106 ರನ್​ ಸಿಡಿಸಿದರು.

  ಕೊನೆಯಲ್ಲಿ ಬಿಶೂ ಹಾಗೂ ರೋಚ್​ ಬಿರುಸಿನ ಆಟದ ಮೂಲಕ ತಂಡದ ಮೊತ್ತವನ್ನು 320ರ ಗಡಿ ದಾಟಿಸಿದರು.